Зеленский Путиннинг «сулҳ» таклифини кескин танқид қилди: «Биз парад эмас, инсон ҳаётини қадрлаймиз!»

Украина президенти Володимир Зеленский Россия раҳбари Владимир Путиннинг 8 майдан 10 майгача Украинада вақтинчалик «сулҳ» эълон қилиш таклифини кескин танқид остига олди. Украина раҳбарига кўра, Россия бу билан яна манипуляция қилишга ва АҚШ каби халқаро ҳамкорларни алдашга ҳаракат қилмоқда.

Бу ҳақда Зеленский душанба, 29 апрель куни ўзининг кечки видео мурожаатида таъкидлади.

«Биз ҳар қандай урушни тўхтатиш учун халқаро ҳамкорлар билан ҳамкорликка тайёрмиз. Бироқ Россия ҳали ҳам барча таклифларни рад этиб, фақатгина манипуляция қилиш, жаҳон ҳамжамиятини алдаш билан овора. Энди яна бир айёрлик қилишга уринишмоқда: улар нима учун ҳамма 8 майгача кутиши кераклигини айтмоқда ва айнан Путин парад ўтказаётган пайтда жим туришимиз керак экан», – деди Зеленский.

Украина президенти бу каби таклифларни қабул қилиш мумкин эмаслигини таъкидлади ва инсонлар ҳаётини қадрлаш парадлардан анча муҳим эканлигини эслатди.

«Биз парадларни эмас, балки инсонларнинг ҳаётини қадрлаймиз. Бутун дунё ҳам бунга ишонади. Шунинг учун ҳам ўт очишни тўхтатиш учун 8 майни кутишга ҳеч қандай асос йўқ. Урушни вақтинчалик эмас, балки доимий, кафолатланган ва кам деганда 30 кунлик ишончли сулҳ билан тўхтатиш керак. Улар бир неча кун сукут сақлаб, кейин яна одамларни ўлдиришга қайтиши мумкин эмас», – дея кескин баёнот берди Зеленский.

Шунингдек, Украина президенти Россия армияси Черкасск вилоятига учирган дрон ҳужуми ҳақида ҳам гапириб ўтди. У бу ҳолатда ҳам ҳарбий эмас, балки тинч аҳоли учун муҳим бўлган объект зарар кўрганини ва газ таъминотини тиклаш ишлари олиб борилаётганини маълум қилди.

Зеленский дунёни яна бир бор Украинадаги тинч аҳолининг тақдирига эътибор қаратишга ва Россиядан ҳар қандай уруш ҳаракатларини дарҳол тўхтатишни талаб қилишга чақирди.