АҚШ вице-президенти Украинадаги вазият ядро урушига айланиб кетишидан хавотир билдирди

Украинада давом этаётган ҳарбий ҳаракатлар вақт ўтиши билан ядровий қурол ишлатиладиган можарога айланиши мумкин. Бу ҳақда АҚШ вице-президенти Жей Ди Венс америкалик машҳур подкастер Чарли Керкка берган интервьюсида айтиб ўтди.

Венснинг фикрича, агар Россия ва Украина ўртасидаги ҳарбий можаро яна бир неча йил давом этадиган бўлса, украиналикларнинг ғалаба қозониши имконияти йўқ. У шунингдек, "уруш узоқ чўзилса, Россия мағлуб бўлади", деган фикрларни рад қилди.

"Агар бу уруш тўхтамаса, украиналиклар унда ғалаба қозона олмайди. Бу реал вазият", – деди Венс ўз сўзида.

АҚШ вице-президенти икки мамлакатнинг ҳам ҳарбий ҳаракатлар туфайли жиддий демографик тангликка дуч келишини таъкидлади. Унинг айтишича, можаро янада чуқурлашиб, миллионлаб инсонларнинг ҳалок бўлишига олиб келиши, энг хавфлиси – уруш "ядро урушига айланиши мумкин".

Дональд Трамп президентлигининг биринчи 100 кунида урушни тўхтатиш бўйича музокараларда қанчалик муваффақиятга эришилгани ҳақида саволга Венс қуйидагича жавоб қайтарди:

"Руслар ва украинлар урушни тўхтатдими? Йўқ. Лекин шуни таъкидлашим керакки, биз уч ой давомида олдинги уч йилга қараганда кўпроқ натижаларга эришдик", – деди у.

Унинг сўзларига кўра, Украина, Россия ва Европанинг турли давлатлари вакиллари, ҳатто баъзида норозилик билдириб турсалар ҳам, Трамп дипломатияси вазиятни ҳар қачонгидан кўра кўпроқ ўзгартиришга ёрдам берганини тан олишмоқда.

"Бу катта ютуқ. Баъзан украинлардан, баъзан руслардан хафсалангиз пир бўлади. Музокара жараёнининг табиати шундай. Лекин Президент Трамп бу жараённинг орқага қайтишига йўл қўймайди", – дея таъкидлади Венс.

Венс музокаралар борасида ўзи ҳам икки ҳафта олдингига қараганда бугун кўпроқ оптимистик кайфиятда эканлигини айтди.

Шу билан бирга, АҚШ вице-президенти 23 апрель куни Ҳиндистонга ташрифи чоғида АҚШ томонидан Россия ва Украинага тинчлик бўйича аниқ таклиф билдирилгани ҳақида ҳам гапириб ўтди.

"Агар Москва ва Киев Вашингтоннинг урушдан кейинги давр бўйича аниқ режасига рози бўлмаса, АҚШ бу музокара жараёнидан чиқиб кетиши мумкин. Биз ҳар икки томонга, Россия ва Украинага жуда аниқ таклиф киритдик. Улардан 'ҳа' ёки 'йўқ' деган жавобни эшитиш вақти келди", – деди Жей Ди Венс.

Айни пайтда АҚШ маъмуриятининг Украинадаги вазият бўйича ушбу жиддий баёноти халқаро жамоатчилик орасида катта муҳокамаларга сабаб бўлмоқда.