Нидерландияда 50 миллион евролик картина тасодифан шикастланди

Нидерландиянинг Роттердам шаҳрида жойлашган машҳур Boymans van Beningen музейида кўнгилсиз ҳодиса содир бўлди. BBC хабар беришича, музейнинг махсус экспозиция зали — Depot’да америкалик таниқли рассом Марк Ротконинг «Grey, Orange on Maroon, No.8» номли жуда қимматли картинасини ёш бола тасодифан шикастлади.

Маълум қилинишича, музейдаги омбор-залда коллекциядан саралаб олинган асарлар кўргазмага қўйилган бўлиб, воқеа айнан шу ерда юз берган. Ҳодиса содир бўлган пайтда музей ходимлари асарни кузатмаётган бўлган, натижада картинанинг пастки қисмида лак билан қопланмаган ҳудудида бир нечта майда тирналишлар юзага келган.

Музей вакиллари шикаст етарли даражада юзаки эканини таъкидлашмоқда, аммо экспертлар гуруҳи картинани қайта тиклаш бўйича энг мақбул ечим топиш учун таҳлил ишларини бошлаб юборишган. Ҳозирда Нидерландия ва хорижлик реставраторлар асарни аввалги ҳолатига қайтариш бўйича биргаликда иш олиб боришмоқда. Тиклаш жараёнидан кейин картина яна кенг жамоатчилик эътиборига тақдим этилади.

Реставрация мутахассислари томонидан таъкидланишича, замонавий санъат асарлари, жумладан, Марк Ротконинг картиналари лак қатлами билан ҳимояланмаганлиги туфайли ҳатто энг кичик зарарларга ҳам жуда сезгир бўлади. Ушбу турдаги асарларни тиклаш жараёни рассом томонидан фойдаланилган махсус бўёқ ва елимларнинг таркиби сабабли анча мураккаблашади.

Эслатиб ўтамиз, аввалроқ 2024 йил сентябрь ойида Винсент Ван Гогнинг машҳур «Кунгабоқарлар» асарига шўрва сепиб, шикаст етказган фаоллар озодликдан маҳрум қилинган эди. Суд жараёнида ўзини ҳимоя қилган айбланувчилардан бири бу жазо нафақат фаолларга, балки «демократия асосларига қарши қаратилган ҳаракат» эканини таъкидлаган эди.

Ҳозирча Boymans van Beningen музейида юз берган ушбу тасодифий ҳодиса қандай ҳуқуқий оқибатларга олиб келиши маълум қилинмаган. Аммо шундай ҳодисалар дунёдаги йирик музейларнинг санъат асарларига нисбатан хавфсизлик чораларини янада кучайтиришга ундаши мумкин. «Замин»ни Telegram’да ўқинг!