Украинада жанг қилган шимолий кореялик ҳарбийларнинг йўқотишлари маълум бўлди

Украинага қарши Россия армияси таркибида урушга жалб этилган Шимолий Корея ҳарбийларининг қарийб 600 нафари ҳалок бўлган. Бу ҳақда Reuters ахборот агентлиги Жанубий Корея разведкасининг маълумотларига асосланиб хабар тарқатди.

Маълум бўлишича, КХДР ҳарбийлари асосан Россиянинг Курск вилояти ҳудудига жўнатилган ва жангларда ҳалок бўлган шимолий кореялик ҳарбийларнинг жасадлари айнан шу ерда кремация қилинган. Агентликнинг хабар беришича, жароҳатланганларни ҳам ҳисобга олганда, Шимолий Корея армиясининг умумий йўқотишлари 4700 нафардан ошган.

Шимолий Корея ҳарбийлари Россия армияси сафига 2024 йилнинг июнь ойида имзоланган икки томонлама стратегик ҳамкорлик шартномаси асосида жалб қилинган. Тахминларга кўра, КХДР уруш учун тахминан 15 минг нафар аскар жўнатган бўлиши мумкин. Россия президенти Владимир Путин Шимолий Корея етакчиси Ким Чен Инга ушбу ёрдам учун миннатдорчилик билдирган.

Ўз навбатида, Ким Чен Ин Россия томонида урушда иштирок этган ҳарбийларни «қаҳрамонлар» деб атаб, уларнинг Украинага қарши операцияда қатнашганини «муқаддас миссия» дея баҳолаган. Шунингдек, Пхеньянда ушбу ҳарбийлар шарафига махсус ёдгорлик ўрнатилишини маълум қилган.

Шимолий кореялик ҳарбийлар Украина уруши пайтида янги қурол-аслаҳалар, хусусан, дронлардан фойдаланишни ўзлаштирган ва жанговар салоҳиятини сезиларли даражада оширган.

Эслатиб ўтамиз, шу йилнинг январь ойида Украина армияси Курск вилояти ҳудудида икки нафар шимолий кореялик ҳарбийни асир олганди. Украина президенти Владимир Зеленский 12 январь куни асирга тушган КХДР ҳарбийларининг сўроқ жараёни акс этган видеони эълон қилган. Видеода кўринишича, улар жанг майдонида эканини билмаган, уларга бу фақат ўқув машғулоти экани айтилган. «Замин»ни Telegram’да ўқинг!