Трампнинг тариф уруши: нефть бозорида рекорд даражадаги пасайиш кузатилди!

Доналд Трампнинг глобал миқёсдаги янги тариф сиёсати сўнгги уч ярим йил ичида жаҳон бозоридаги нефть нархи кескин пасайишига сабаб бўлди. Бу ҳақда Reuters агентлиги хабар бермоқда.

Маълум қилинишича, 30 апрель куни Лондон биржасида Brent маркали нефть фючерслари бир баррель учун 49 цент ёки 0,8 фоиз арзонлашиб, 63,76 долларгача тушган. Шунингдек, АҚШдаги West Texas Intermediate (WTI) навли нефть ҳам 40 цент ёки 0,7 фоизга пасайиб, бир баррель учун 60,02 долларни ташкил этди.

Жорий йил апрель ойида Brent нефти тахминан 15 фоиз, WTI эса 16 фоиз арзонлади. Reuters агентлиги таъкидлашича, бу 2021 йилнинг ноябридан буён кузатилган энг катта пасайиш ҳисобланади.

Нефть бозорида кузатилаётган бу ўзгаришлар АҚШ президенти Доналд Трампнинг жорий йил 2 апрелда эълон қилган янги тариф сиёсати билан боғлиқ. Унга кўра, Америкага импорт қилинаётган барча товарларга қўшимча бож солинадиган бўлди. Бу эса нафақат Хитой, балки бошқа давлатлар билан ҳам глобал савдо кескинлашувини келтириб чиқарган. Пекин маъмурияти ҳам АҚШнинг ушбу қарорларига қарши чораларни қабул қилди.

Reuters томонидан ўтказилган таҳлилларга кўра, Трамп маъмуриятининг тариф сиёсати жаҳон иқтисодиётини кескин рецессия ҳолатига олиб келиши мумкинлиги ҳақида хавотирларни оширган. Буни тасдиқлайдиган ҳолатлар ҳам мавжуд: апрель ойида Хитойнинг ишлаб чиқариш секторида сўнгги 16 ой ичидаги энг юқори суръатда пасайиш кузатилди.

Шу билан бирга, нефть нархининг янада пасайишига ОПЕК+ мамлакатларининг нефть ишлаб чиқариш ҳажмини ошириш режалари ҳам сабаб бўлган. Май ва июнь ойларида қора олтин қазиб олиш ҳажмининг ошиши эҳтимол қилинаяпти.

Экспертлар фикрича, агар тарифлар урушини ҳал қилиш бўйича аниқ чоралар кўрилмаса, бу вазият узоқ муддатгача жаҳон иқтисодиётига салбий таъсир кўрсатиши мумкин. Айниқса, Хитой ва АҚШ ўртасидаги муносабатларнинг кескинлашуви бозор иштирокчиларининг ишончини пасайтириб, нархларни янада арзонлашишига сабаб бўлиши эҳтимолдан холи эмас. «Замин»ни Telegram’да ўқинг!