АҚШ ва Украина тинчлик бўйича 22 шартда келишди: эътибор энди Россияда

2025 йил 23 апрель куни Лондонда бўлиб ўтган музокараларда АҚШ ва Украина Россия билан урушни тинч йўл билан якунлаш борасида 22 та аниқ шарт бўйича келишувга келди. Бу ҳақда АҚШ президенти Доналд Трампнинг Украина ва Россия масалалари бўйича махсус вакили Кит Келлог Fox News телеканали орқали маълум қилди.

“22 та аниқ шарт. Қийин, лекин очиқ муҳокамалар орқали” – Келлог

«Биз украиналиклар билан очиқ ва чуқур музокаралар ўтказдик. Ушбу жараёнда 22 та жуда аниқ шартни таклиф этдик ва бу билан мустаҳкам позицияда эканлигимизга ишонамиз», — деди Келлог. Унинг сўзларига кўра, таклиф қилинган шартлардан баъзилари Украина учун маъқул бўлмаган. Лекин бу, унинг таъкидлашича, «ҳар қандай халқаро музокарада кузатиладиган табиий ҳолат».

“Де-факто розилик бор, лекин де-юре эмас”

Келлог Украина томони Россия босиб олган ҳудудлардан де-факто воз кечишга рози эканлигини таъкидлади. Яъни, Киев бу ҳудудларни ҳуқуқий жиҳатдан эмас, балки амалий вазиятга кўра вақтинча тан олишга тайёр.

«Украиналиклар руслар эгаллаб турган ҳудудларини расман эмас, амалий жиҳатдан вақтинча топширишга кўнган. Чунки улар реал вазиятдан келиб чиқиб ҳаракат қилмоқда. Улар тинчлик шартномаси имзоланганда ҳар икки томон ўз позицияларини сақлаб қолишини тушуниб турибди», — деди АҚШ вакили.

Эътибор марказида — тўлиқ ва кенг қамровли ўт очишни тўхтатиш

Келлогнинг сўзларига қараганда, Украина кенг қамровли ва доимий ўт очишни тўхтатишни мақсад қилган. Бу эса тўғридан-тўғри тинчлик келишувига олиб келади. АҚШ президенти Доналд Трамп ҳам шу мақсад сари ҳаракат қилмоқда.

«Биз бир томонни кўндирдик. Энди иккинчи томон — Россия томонидан жавоб кутиляпти. Ва биз бу жараёнга жуда яқинлашдик, деб ўйлайман», — деб қўшимча қилди Келлог.

Урушни тўхтатишда сўз Россия томонида

Биламизки, охирги бир неча ойдан буён Вашингтон Москва ва Киев билан алоҳида тарзда музокаралар олиб бормоқда. Илк уринишларда Америка томони камида 30 кунлик тўлиқ ўт очишни тўхтатишни таклиф этган. Украина буни маъқуллаган, лекин Россия амалий равишда рад этганди.

Шундан сўнг, АҚШ тинчлик келишувини илгари суриш жараёнини бошлади. Лондонда ўтказилган сўнгги музокаралардан кейин Украина ва Европа иттифоқчилари ўз жавоб таклифлари билан чиқишди.

Бу жараёнда энг катта савол: энди Путин қандай қарор қабул қилади? «Замин»ни Telegram’да ўқинг!