Трамп АҚШнинг Иккинчи жаҳон урушидаги ғалабаси ҳақида кескин баёнот билан чиқди

Америка Қўшма Штатлари президенти Доналд Трамп 8 майни АҚШ учун Иккинчи жаҳон урушида ғалаба куни, 11 ноябрни эса Биринчи жаҳон урушидаги зафар куни деб эълон қилди. АҚШ раҳбарининг таъкидлашича, мамлакат ушбу тарихий ғалабаларга бошқа давлатларга нисбатан анча кўп ҳисса қўшган.

Трампнинг баёнотида шундай дейилади: «Кўплаб ҳамкорларимиз ва иттифоқчиларимиз 8 май кунини Ғалаба куни сифатида нишонлашади. Бироқ, Иккинчи жаҳон урушида ғалаба қозониш учун АҚШ бошқа барча давлатлардан кўра кўпроқ ҳисса қўшганини таъкидлаш лозим. Бугун мен расман 8 майни Иккинчи жаҳон урушидаги зафар куни, 11 ноябрни эса Биринчи жаҳон урушидаги ғалаба куни деб эълон қиламан».

Шунингдек, Трамп ушбу икки тарихий ғалабанинг ҳам биринчи навбатда АҚШ қуролли кучларининг жасорати, қудрати ва ҳарбий маҳорати туфайли қўлга киритилганига ишонч билдирди. «Ҳар икки жаҳон урушида ҳам АҚШ куч, жасорат ва ҳарбий маҳорат борасида тенгсиз бўлди, ҳеч ким бизга яқинлаша олмади», — дейди Доналд Трамп.

Бироқ, унинг таъкидлашича, сўнгги йилларда ушбу тарихий ғалабаларни муносиб нишонлашга эътибор берилмаяпти. «Биз энди ҳеч нарсани байрам қилмаяпмиз, чунки бундай байрамларни муносиб тарзда нишонлашни уддалай оладиган етакчиларимиз йўқ эди. Энди эса АҚШнинг буюк тарихий ғалабаларини яна бир бор кўтаринки руҳда нишонлаш вақти келди», — дея қўшимча қилди АҚШ президенти.

Доналд Трампнинг ушбу кескин ва фахрга бой баёноти ижтимоий тармоқларда ва халқаро сиёсий доираларда ҳам қизғин баҳсларга сабаб бўлмоқда. Мазкур байрам саналарининг расмийлаштирилиши АҚШда миллий ғурур ва ватанпарварлик туйғуларини янада кучайтиришга хизмат қилиши айтилмоқда. «Замин»ни Telegram’да ўқинг!