Украина АҚШнинг тинчлик режасига рози бўлди: Келишувнинг тафсилотлари маълум қилинди

23 апрель куни бўлиб ўтган музокаралар якунига кўра, Украина Америка Қўшма Штатлари томонидан тақдим этилган сулҳ шартларига рози бўлди. Бу ҳақда АҚШ президенти Дональд Трампнинг Украина масалалари бўйича махсус вакили Кит Келлог Fox News телеканалига берган интервьюсида маълум қилди.

Келлогнинг сўзларига кўра, АҚШ делегацияси Европа давлатлари ва Украина расмийлари билан биргаликда музокара столи атрофида йиғилиб, тинчлик ўрнатиш учун аниқ 22 та шартни илгари сурган ва Украина томони мазкур шартларни қабул қилган.

«Биз Украиналик ҳамкасбларимиз ва Европа давлатлари билан биргаликда муҳим учрашув ўтказдик. Музокаралар давомида биз аниқ 22 та шартни белгиладик ва Украина ҳукумати бу шартларни қабул қилди», — деди Трампнинг махсус вакили.

Ҳужжатда қайд этилганидек, келишув асосан ҳозирда ҳар икки томон эгаллаб турган ҳудудлар бўйича мавжуд назорат чизиғини сақлаб қолган ҳолда, ўт очишни тўхтатишни назарда тутади. Бу эса яқин келажакда уруш ҳаракатларининг вақтинча «музлатилиши» ҳамда 30 кунлик ўт очишни тўхтатиш режимига ўтишни англатади.

Шунингдек, келишувда Украина ҳукумати Россия томонининг Қрим ва айрим босиб олинган ҳудудлар устидан амалдаги назоратини вақтинчалик тан олишга рози бўлган. Бироқ Киев бу ҳудудларнинг Россия таркибида эканини юридик жиҳатдан тан олмайди. АҚШ эса, ўз навбатида, айни пайтдаги вазиятни ҳисобга олган ҳолда, Қрим яриморолининг Россияга тегишли эканлигини де-юре, Луганск, Донецк, Херсон ва Запорожье вилоятларининг айрим қисмларини эса де-факто тан олишга тайёрлигини билдирган.

«Украина вакиллари музокараларда ўт очишни тўхтатиш кучга кириши билан ҳар икки томон ўзининг шу вақтда эгаллаган позицияларида қолишига тайёрлигини билдиришди. Яқинда ўтказилган учрашувларда бу масала аллақачон муҳокама қилинган эди. Ҳозирги мавжуд назорат чизиғи бўйича вазиятни сақлаб қолишга рози бўлишди», — деб тушунтирди Келлог.

Айни пайтда АҚШнинг ушбу тинчлик режаси расман эълон қилинмаган бўлса-да, унинг асосий бандлари маълум бўлиб улгурган. Хусусан, ушбу режа Украинанинг Харьков вилоятининг айрим қисмларини қайтариб олишини, Запорожье атом электр станцияси ва Каховка ГЭС устидан назоратни тиклашни, Днепр дарёсида эркин ҳаракатланиш ҳуқуқини таъминлашни ва Николаев вилоятидаги стратегик аҳамиятга эга бўлган Кинбурн қўлтиғи устидан назоратни қайтаришни ҳам ўз ичига олади.

Бу келишув тинчлик йўлидаги муҳим қадам сифатида баҳоланмоқда ва яқин келажакдаги музокараларда янада кенгроқ кўриб чиқилиши кутилмоқда. «Замин»ни Telegram’да ўқинг!