Дунёдаги энг йирик электрокема Тасманияда сувга туширилди

Австралиянинг Тасмания штатида жойлашган Хобарт портида тарихий воқеа рўй берди — Incat компанияси томонидан қурилган ва Hull 096 деб номланган электрокема расман сувга туширилди.

Бу нафақат Австралия, балки дунё кемасозлик саноати учун ҳам катта қадам ҳисобланади. Чунки Hull 096 фақат электр энергиясида ҳаракатланувчи энг йирик кемага айланди.

130 метрлик титан: Электрда ҳаракатланади, ифлослантирмайди

Ушбу кема узунлиги бўйича 130 метрни ташкил этади ва бир вақтнинг ўзида 2100 нафар йўловчи ҳамда 225 та автомобилни ташиш имкониятига эга.

Унинг энг асосий жиҳати — тўлиқ аккумуляторларда ишлашидир. Кема ичига ўрнатилган электр батареялари оғирлиги 250 тонна бўлиб, умумий қуввати 40 мегаватт-соатдан зиёд.

Буларнинг барчаси саккизта юқори самарадорликка эга электр сув двигателларига уланган. Улар кемага улкан тезлик ва ҳаракат имкониятини беради.

“Бу бизнинг тарихимиздаги энг дадил ва мураккаб лойиҳа”

Incat компанияси раиси Роберт Клиффорд Hull 096 ҳақида шундай деди:

“Биз Тасманияда қирқ йилдан бери жаҳон даражасидаги кемаларни қуриб келяпмиз. Аммо Hull 096 — энг дадил, энг мураккаб ва шубҳасиз, энг муҳим лойиҳамиз. Бу кемани яратиш орқали биз нафақат технологияда, балки атроф-муҳит муҳофазасида ҳам янги босқичга кўтарилдик.”

Унинг сўзларига кўра, компания келажакда экологик тоза кемаларни нафақат Австралияда, балки халқаро бозорда ҳам кенг тарқатиш ниятида.

“Энг катта электрокема ва транспорт воситаси”

Incat’нинг маълум қилишича, Hull 096 нафақат дунёдаги энг катта электр кема, балки бугунгача ясалган энг йирик тўлиқ электрда ишловчи транспорт воситаси сифатида ҳам тан олинмоқда.

Incat бош директори Стивен Кейси ўз фикрларида қуйидагиларни алоҳида қайд этди:

“Hull 096 исботламоқдаки, паст эмиссияли, кенг кўламли транспорт воситалари нафақат орзудир, балки бугуннинг ўзида амалга ошиши мумкин бўлган воқеликдир. Бу кема фақат техник ечим эмас — у келажакнинг тимсоли.”

Hull 096 лойиҳаси — электромобиллардан ташқарида ҳам “яшил энергия” қандай кенг қўлланилаётганини намоён этувчи яққол мисол. «Замин»ни Telegram’да ўқинг!