АҚШ Украина бўйича ёндашувини ўзгартирмоқда

Қўшма Штатлар Украина ва Россия ўртасидаги урушга нисбатан ўз дипломатик ёндашувини ўзгартирмоқда. Давлат департаменти матбуот котиби Тэмми Брюс билдиришича, Вашингтон энди ушбу можарада “чопиб юрадиган” воситачи ролида бўлмайди.

Унинг таъкидлашича, Америка томони тинчликка олиб борувчи ҳар қандай ташаббус ва ҳаракатларни қўллаб-қувватлашда давом этади, бироқ жараёнга тўғридан-тўғри аралашмасдан, янада эҳтиёткор позицияда ҳаракат қилади.

Санкциялар бекор қилинмайди

Шу билан бирга, Брюс маълум қилишича, Россияга нисбатан жорий қилинган иқтисодий ва сиёсий санкциялар ўз кучида қолади. Америка бу чекловларни бекор қилиш ниятида эмас.

"Реал ечимлар вақти келди"

Брюснинг фикрича, ҳар икки тараф – Россия ҳам, Украина ҳам – энди можарани тугатиш учун амалий ва ҳаётий ечимлар устида ишлаб чиқиши лозим.

“Урушни фақат ташқи босим билан эмас, балки ички ечимлар ва сиёсий ирода билан тугатиш мумкин. Ҳар бир томон энди реал қадамлар ҳақида ўйлаш вақти келди”, – деди у.

Рубио: “Путин ҳам, Украина ҳам максимал мақсадларига ета олмайди”

АҚШ давлат котиби Марко Рубио Fox News’га берган интервьюсида Москва ва Киев ўртасидаги қарама-қаршиликлар ҳали ҳам жиддий сақланиб қолаётганини қайд этди.

“Путин Украина ҳудудининг барчасини қўлга киритиши мумкин эмас. Украина эса Россияни 2014 йилгача бўлган чегараларга қайтаришга қодир эмас”, – деди у.

Унинг сўзларига кўра, АҚШ тинчлик йўлидаги дипломатик саъй-ҳаракатлардан воз кечмаяпти, аммо бу жараёнда қандай суръат ва қандай чегарада иштирок этиш масаласи келгусида Доналд Трампнинг сиёсатига боғлиқ бўлади.

“Хитойнинг ўрни муҳимроқ бўлиб бормоқда”

Рубио шунингдек, халқаро сиёсий кун тартибидаги вазиятга тўхталар экан, Россия ва Украина ўртасидаги низо дунё учун муҳим бўлиб қолаётганини қайд этди. Аммо, унинг таъкидлашича, Хитой билан боғлиқ жараёнлар — геосиёсий мувозанат нуқтаи назаридан узоқ муддатда янада катта аҳамиятга эга бўлиши мумкин.

Вашингтоннинг бу ҳаракати халқаро миқёсда қандай қабул қилинади? АҚШ ўзини орқага тортган вазиятда тинчликка олиб борувчи ечимлар яна қайси давлатлар орқали амалга оширилиши мумкин? «Замин»ни Telegram’да ўқинг!