Зеленский Путиннинг ўт очишни тўхтатиш таклифини рад этди ва уни «спектакль» деб атади

Украина президенти Владимир Зеленский Россия етакчиси Владимир Путиннинг 8 майдан 11 майгача бўлган муддатда ўт очишни вақтинча тўхтатиш ҳақидаги таклифини рад этди. Украина президентининг таъкидлашича, Киев ушбу муддатда эмас, балки 7 майдан бошлаб 30 кунлик тўлиқ сулҳ режимига тайёр. Бу ҳақда BBC хабар тарқатди.

«Бу катта саҳнадаги спектаклдан бошқа нарса эмас», – деб таъкидлади Зеленский Россия томонидан билдирилган таклифга изоҳ бериб.

Украина етакчисининг сўзларига кўра, Киев ҳукумати 9 май куни Москвада бўлиб ўтадиган парадда Путинга худди халқаро изоляциядан чиққан каби кўриниш яратишда ёрдам бермоқчи эмас.

«9 май куни Путинга худди изоляциядан чиққан, дунё билан муносабатлари нормаллашган деган таассурот қолдириш учун ҳеч ким ёрдам қўлини чўзмайди», – деб қўшимча қилди Зеленский.

Бундан ташқари, Зеленский Украина Ғалабанинг 80 йиллик юбилейини нишонлаш учун Москвага келадиган хорижий давлат раҳбарларининг хавфсизлигини таъминлашга кафолат беролмаслигини айтди. Унинг фикрига кўра, мазкур ташрифларнинг хавфсизлиги масаласини Россия томони ўзи ҳал қилиши лозим.

Аввалроқ, 28 апрель куни Россия президенти Владимир Путин 8 май куни кечадан 11 май куни кечасигача бўлган муддат учун ўт очишни вақтинчалик тўхтатишни таклиф қилган эди. Бунга жавобан, Украина расмийлари ўт очишни зудлик билан, ҳеч қандай муддатларсиз, дарҳол тўхтатиш таклифини илгари сурди. «Замин»ни Telegram’да ўқинг!