Путин: «Мен ҳар доим Россия президентлигини ким эгаллаши ҳақида ўйлайман»

Россия президенти Владимир Путин ворис танлаш масаласи бўйича доимо ўйлашини, аммо якуний қарор россиялик фуқаролар қўлида эканини айтди. У бу ҳақда «Россия. Кремль. Путин. 25 йил» номли ҳужжатли фильмда маълум қилди.

«Мен ҳар доим ворис ҳақида ўйлайман. Бу масалада турли қарашлар мавжуд — маъмурий ресурслардан фойдаланиш ва олдиндан тахмин қилиб бўлмайдиган технологиялар ҳам бор. Бироқ, якуний танлов барибир халқнинг, яъни россиялик сайловчиларнинг қўлида бўлиши шарт», — деди Путин.

Президент ўз сўзида, у доимий равишда ҳар бир номзоднинг имкониятлари ва салоҳиятини кузатиб, таҳлил қилиб бораётганини таъкидлади. Унинг фикрича, халқ ишончини қозонмаган инсон муҳим вазифаларни бажариш имкониятига эга бўлиши қийин.

«Давлатнинг барқарорлиги, тараққиёти ва хавфсизлиги учун энг зарур омил — фуқароларнинг ўз раҳбарларига бўлган ишончидир. Бу ишончга эришиш учун эса ҳалол ва самарали меҳнат қилиб, одамларнинг турмуш даражасини ошириш керак», — деди Путин.

Россия президенти бугунги кунда мамлакатда камбағаллик даражасининг тарихдаги энг паст кўрсаткичига эришилганини алоҳида қайд этди.

«Албатта, инсонлар доимо келажакка умид билан қарайдилар ва вазият яхшиланишига ишонади. Улар бу борада ҳақлидир. Агар халқ ишонса, ҳокимиятга бўлган ишонч ҳам таъминланади. Бу жамият бирлигининг асосий шартидир», — деб таъкидлади у.

Путин, шунингдек, россияликларнинг танлов қилиш имкониятига эга бўлиши учун бир нечта номзоднинг мавжудлиги мақбулроқ эканини таъкидлади. «Келажакда мамлакатни ким бошқариши ҳақида ўйлайсизми?» деган саволга жавобан:

«Фуқароларнинг ишончини қозона оладиган битта шахс ёки одамларга танлаш имкониятини берувчи бир нечта номзод пайдо бўлиши керак», — деди президент.

Владимир Путин ўз фаолиятида доимо халқнинг қўллаб-қувватлаши ва ишончига таяниб ишлаётгани учун россияликларга миннатдорлик билдирди. «Замин»ни Telegram’да ўқинг!