Леди Гага Бразилияда тарихий концерт ўтказди: 2 миллиондан зиёд мухлис йиғилди

3 май куни машҳур америкалик поп юлдузи Леди Гага ўзининг фаолиятидаги энг катта ва энг шов-шувли концертларидан бирини Бразилиянинг энг машҳур соҳили – Рио-де-Жанейродаги Копакабанада ўтказди. Ушбу тарихий тадбир бепул ташкил этилди ва дунё бўйича энг кўп томошабин йиғган мусиқий тадбирлар қаторига кирди.

Концерт ташкилотчиларининг аниқ маълум қилишича, Копакабана соҳилига хонанда ижросини томоша қилиш учун 2 миллион 100 мингдан зиёд мухлис ташриф буюрган. Леди Гага ўз чиқишини бошлашдан аввал саҳнадан мухлисларга самимий миннатдорчилик билдирди:

«Бугун биз сизлар билан тарих яратяпмиз, бу тарихни биргаликда ёзаётганимиз учун ҳар бирингизга раҳмат айтаман», – деди юлдуз ўз чиқишини бошлар экан.

Ушбу ажойиб концерт маҳаллий вақт билан кечки соат 22:10 да бошланган бўлса-да, айрим мухлислар саҳна ёқинидан қулай жой эгаллаш учун эрталабданоқ соҳилга келиб жойлашишган ва бутун кун давомида қуёш остида концерт бошланишини сабрсизлик билан кутишган. Баъзи айниқса шижоатли томошабинлар эса, концертни яхшироқ кузатиш учун ҳатто атрофдаги дарахтларга чиқиб олганлари хабар қилинди.

Леди Гага ўзининг шоу дастурини 2011 йилда машҳурликка эришган Bloody Mary қўшиғи билан бошлади ва ундан сўнг бутун дунё бўйлаб миллионлаб мухлисларнинг қалбидан жой олган хитлари – Poker Face, Alejandro, шунингдек, яқинда чиқарган янги композицияси Abracadabra билан давом эттирди. Концерт том маънода мухлислар учун ажойиб бир байрамга айланиб кетди.

Концерт ҳақида ўз таассуротлари билан бўлишган мухлислардан бири, 27 ёшли Мануэла Добес ўз ҳиссиётларини яширмади:
«Бугун ҳаётимдаги энг ажойиб кун бўлди. Шундай улкан томошанинг бир қисмига айланганимдан жуда бахтиёрман!»

Айтиш жоизки, мазкур катта тадбир нафақат поп юлдузи ва унинг мухлислари учун, балки бутун Рио-де-Жанейро шаҳри учун катта аҳамиятга эга бўлди. BBC тарқатган хабарга кўра, концерт туфайли шаҳар иқтисодиётига тахминан 100 миллион АҚШ доллари миқдорида даромад кириб келиши кутилмоқда. Маҳаллий ҳокимиятлар шаҳар иқтисодиётини янада ривожлантириш ва туристлар оқимини ошириш мақсадида мунтазам равишда бундай катта миқёсдаги тадбирларни ташкил қилиб келади.

Эслатиб ўтамиз, Копакабана соҳили аввал ҳам Майкл Жексон, Rolling Stones каби машҳур юлдузларнинг улкан концертларига мезбонлик қилган. Аммо Леди Гага томошаси охирги йиллардаги энг кўп томошабин йиғилган ва энг катта шов-шувга сабаб бўлган тадбирлардан бири бўлди. «Замин»ни Telegram’да ўқинг!