Тиббиётда инқилобий янгилик: Тайванлик жарроҳлар донор юрагини уришдан тўхтатмасдан кўчирди

Тайван Миллий университети шифохонаси (NTUH) дунё тиббиёти тарихида илк бор донор юрагини бир сонияга ҳам уришдан тўхтатмаган ҳолда кўчириб ўтказди. Ушбу улкан ютуқ ҳақида Fox News телеканали хабар берди.

Ҳозирги кунгача донор юрак трансплантациясида асосан совуқда сақлаш усули қўлланиб келинаётган эди. Бу жараёнда донор органининг қон айланиши вақтинча тўхтатилиб, юрак мушагига кислород етиб бориши қисқариб қолади. Натижада аъзонинг тўқималарига зарар етиш ва организм томонидан рад этиш хавфи ошади.

Тайванлик жарроҳлар эса мазкур муаммоларга бутунлай барҳам берувчи янги инновацион технологияни яратишди. Уларнинг ишлаб чиққан янги тизими портатив ҳаётни таъминлаш қурилмаси сифатида ишлайди ва донор юрагини кислородга бой қон билан узлуксиз таъминлайди. Бу тизим юракни инсон танасидан ташқарида насослар, оксигенаторлар ва махсус резервуарлар ёрдамида фаол ҳолда сақлаб туради.

Биринчи бундай операция пайтида донор юраги, ҳали уришдан тўхтамаган ҳолда, махсус жиҳозга уланган кўйи операция хоналари ўртасида кўчирилди. Юракни қабул қилган бемор 49 ёшли аёл бўлиб, у дилатацион кардиомиопатия касаллиги билан оғриган эди. Операциядан кейин бемор тез орада соғайишни бошлади ва юракнинг соғлиғи учун асосий кўрсаткич ҳисобланган ферментлар миқдори жуда паст даражани намоён қилди. Бу эса операциянинг муваффақиятли ўтганидан далолат беради.

Аввалроқ 2023 йилда АҚШдаги Стенфорд университети шу каби трансплантацияни амалга оширган бўлса-да, уларнинг усулида юрак қисқа муддатга (10-30 дақиқа) ишемик ҳолатга тушган. Тайванлик жарроҳларнинг усули эса юракнинг бирор сонияга ҳам уришдан тўхтамаслигини кафолатлайди.

«Биз қўллаган усулда юрак нафақат кўчириб ўтказишдан кейин, балки олинишидан олдин ҳам тўхтовсиз уришда давом этди. Умуман олганда, юрак ҳатто бир сония ҳам тўхтамади», – деб таъкидлади NTUH орган трансплантацияси бўлими раҳбари доктор Чен Их-Шурнг.

Экспертларнинг таъкидлашича, бу тиббиёт соҳасида ҳақиқий инқилоб бўлиб, эндиликда юрак трансплантациясининг хавфсизлиги ва самарадорлигини сезиларли даражада ошириши мумкин. Янги технология тиббий дунёда катта қизиқиш уйғотиб, донор органларини кўчириш жараёнида кўплаб инсон ҳаётларини сақлаб қолиш имкониятини янада кенгайтиради. «Замин»ни Telegram’да ўқинг!