Трамп Россиянинг Украина бўйича режаларини фош қилди: Москва бутун Украинани эгалламоқчи!

АҚШ президенти Дональд Трамп Россиянинг Украинага нисбатан режалари ҳақида гапириб, Кремль ҳақиқатан ҳам бутун Украинани босиб олишни кўзлаётганини маълум қилди. Бу ҳақида АҚШ етакчиси NBC News телеканалига берган интервьюсида алоҳида тўхталиб ўтди.

"Россия учун ҳозир эгаллаб турган ҳудудлари кифоя эмас. Унга Украина бутунлай керак. Агар мен вазиятга ўз вақтида аралашмаганимда, Москва Украина учун янада кенг кўламли ва шиддатли урушга киришар эди", — деди Трамп.

Бундан олдин, яъни 24 апрель куни Трамп Россия Украина билан можарони ҳал қилиш жараёнида сезиларли ён беришларга рози эканлигини ва эндиликда мамлакатнинг бутун ҳудудига эмас, балки фақат айрим қисмларигагина даъво қилаётганини айтган эди. Бироқ кейинроқ у Украинанинг Россия томонидан босиб олинган ҳудудларини, жумладан Қримни қайтариш бўйича талабларини "маънога эга бўлмаган" деб атаган.

Бундан ташқари, The Wall Street Journal газетаси маълумотларига кўра, АҚШ ҳукумати Украинадаги зиддиятни тинч йўл билан ҳал қилиш мақсадида қатор таклифларни тайёрлаган. Ушбу таклифлар рўйхатига Қўшма Штатларнинг Қрим яриморолини расман Россия ҳудуди сифатида тан олиши, шунингдек Россия Федерациясининг Украинада янги босиб олинган ҳудудлари устидан яширин равишда назоратини эътироф этиши ва Украинанинг НАТО аъзолиги масаласини муҳокамалардан бутунлай чиқариб ташлаш каби бандлар киритилган.

Шу йилнинг апрель ойида АҚШ президенти "Россия нималарга рози бўлиши мумкин?" деган саволга "Урушни тўхтатиш ва бутун мамлакатни босиб олишни исташдан воз кечиш" деб жавоб берганди. Трамп шу билан бирга Россия сезиларли даражада ён беришга тайёр эканлигини таъкидлаганди. У буни Путиннинг уни шахсан ҳурмат қилиши билан изоҳлаган.

"Менимча, Владимир Путин мени ҳурмат қилади. Ана шу сабабли Россия бутун Украинани эгаллаб олмаслигига ишонаман. Ҳатто Путиннинг шахсий қарори бутун Украинани босиб олиш бўлса-да, у бундан менинг позициям сабабли воз кечиши мумкин", — дея фикрини якунлади Дональд Трамп.

Шундай қилиб, АҚШ президентининг бу фикрлари халқаро жамоатчиликда Украинадаги можаро истиқболи борасида қизғин муҳокамаларни келтириб чиқариши табиий. Россия томонининг Украина бўйича мақсадлари ҳақидаги баёнотлар эса яқин келажакдаги сиёсий музокараларда асосий мавзулардан бири бўлиб қолиши кутилмоқда. «Замин»ни Telegram’да ўқинг!