АҚШ армиясида катта ўзгариш: генераллар сонини сезиларли қисқартиришга қарор қилинди

АҚШ Мудофаа вазири Пит Ҳегсет мамлакатнинг ҳарбий харажатларини қисқартириш бўйича олиб бораётган кенг кўламли кампанияси доирасида муҳим қарор қабул қилди. Унга кўра, Америка Қўшма Штатлари қуролли кучларидаги юқори қўмондонлик даражасида хизмат қилаётган генерал ва адмираллар сони жиддий равишда қисқартирилади.

Мудофаа вазирлигининг расмий маълумотларига асослансак, бу қисқартириш биринчи навбатда Бош штаб бошлиқлари, Миллий гвардия генераллари ва Бирлашган қўмондонлик тизимига таъсир қилади. Хусусан, умумий таркибнинг 20 фоизини ташкил этувчи генерал ва адмираллар лавозимидан озод этилади. Қўшимча равишда, Миллий гвардия таркибидаги юқори лавозимдаги шахсларнинг 20 фоизи, Бирлашган қўмондонлик тизимининг эса яна 10 фоизи қайта ташкил этилади.

Мудофаа вазирлиги тақдим этган сўнгги маълумотга кўра, 2025 йил 31 март ҳолатигача АҚШ армиясида 38 нафар юқори мартабали қўмондон — генерал ва адмираллар фаолият юритмоқда. Улар орасида Бош штаб бошлиқлари бирлашган қўмитаси раиси, қуролли кучлар турлари бўйича штаблар бошлиқлари, Европа ва Африкадаги қўмондонлик раҳбарлари, ҳамда Корея яриморолидаги америкалик ҳарбий кучлар раҳбарлари бор.

Қизиғи шундаки, Ҳегсет ким аниқ лавозимдан озод этилишига оид аниқ исмларни очиқламади. Бироқ, бу қарор Пентагонда катта ислоҳотлар бошланганидан далолат беради.

Эслатиб ўтамиз, АҚШнинг аввалги президенти Доналд Трамп маъмурияти давомида ҳам бир қатор юқори мартабали ҳарбий хизматчилар ўз лавозимларидан четлатилганди. Улар орасида генерал-лейтенант Женнифер Шорт, адмирал Лиза Франкетти ва адмирал Линда Фэган каби юқори даражадаги шахслар ҳам бор эди. Шунингдек, 2024 йил бошида Штаблар қўмитаси раиси Чарлз Браун ҳам истеъфога чиқарилган эди.

Бу жараён билан бирга, АҚШ тарихида биринчи марта ҳарбий бюджет бир триллион доллардан ошиши режалаштирилмоқда. Оқ уй келгуси йилларда "Олтин гумбаз" номли янги ракетага қарши мудофаа тизимини яратиш, ҳарбий кемаларни кўпайтириш ва ядровий салоҳиятни мустаҳкамлашни ўз олдига мақсад қилиб қўйган.

Ҳозирча ушбу жараёнларнинг АҚШ ҳарбий салоҳияти ва халқаро позициясига қандай таъсир қилиши ноаниқ. Бироқ, бу ўзгаришлар армиядаги раҳбарият тизимини қайта шакллантириши ва ҳарбий сиёсатга янгича юз тутиши аниқ. «Замин»ни Telegram’да ўқинг!