Қатиқ, мураббо ва ядро қуроли. Путин янги филмда нималар деди?

Россия президенти Владимир Путин ҳақида навбатдаги ҳужжатли филм намойиш этилди. Россия давлат каналларида «Россия. Кремл. Путин» деган бутун бошли рукн бўлиб, бу мавзуда кўп филмлар намойиш этилган. Бу галги ҳужжатли филм Россия қўшниси Украина ерларини эгаллаш учун тўртинчи йил урушаётган бир вақтда кўрсатилгани учун ундаги баъзи жиҳатларга тўхталамиз.

Филм «Россия. Кремл. Путин. 25 йил» деб номланади. Айнан 25 йил аввал Путин илк марта Россия президенти бўлганди. Кейинчалик у 5 марта президентлик сайловларини ютиб, Россиянинг ўзгармас президенти сифатида мамлакатни бошқариб келди. Орада Дмитрий Медведев президент бўлган тўрт йилликда ҳам Россияни аслида ким бошқарганини барча россияликлар яхши билади.

Филм номидаги 25 йил аслида Путин чорак аср аввал давлат тепасига келганини ифодаласа-да, бу рақам унинг давлатни бошқарган йилларини билдиради десак ҳам муболаға бўлмайди.

Бу галги интервю-филмда Путиннинг суҳбатдоши охирги йилларда президент пулидаги асосий журналистга айланган Павел Зарубин бўлди. Зарубин бутун филм давомида доимий ҳаяжонланган, айниқса Путинга савол бериш вақтида ундаги қўрқув аралаш ҳаяжон яққол сезилади. Ахир Путин билан гаплашишдаги совуққонлик ва харизма масаласида Зарубин Владимир Рудолфович Соловёв даражасига чиқишига ҳали анча бор.

Қатиқ, мураббо ва конфет

Кўрсатувнинг услуби ҳақида икки оғиз. Журналист сифатида бунга ҳаққимиз бўлса керак. Хуллас, муаллифлар Путинни урушаётган давлат раҳбари сифатида эмас, шунчаки Россияни бошқараётган президент сифатида кўрсатишга уринган. Видео бошида унинг жуда тиғиз иш режимига урғу берилади. Путин тунги соат иккида ҳам Кремлда учрашув ўтказган. Журналист Путин кун давомида 35 та учрашув ўтказганини санаган. Тун ярмидан оққанда Кремлда Путиннинг кабинетида эканини айтиб, одамларни ишонтиришга урингандек соат милларини ҳам кўрсатиб қўйган.

Кейин кечаси соат иккида Путиндан иш кабинетини кўрсатишни сўраган. Россия президенти бажонидил Зарубинни ўз кабинетига таклиф этиб, ҳатто уни меҳмон қилган. Видеодан Путиннинг иш кабинети ичкарисида алоҳида ошхона борлиги кўринади. Президент журналистни нима билан меҳмон қилишни билмай, унга музлаткичдан зардобли қатиқ олиб қуйиб берган. Кейин Лукашенко совға қилган конфет ва мураббо билан сийлаган. Путин қуйиб берган кефирда «Эковакино» ёзуви кўрингач, Россиядаги расталарда одамлар ёппасига бу кефирни сотиб олган.

Журналистлар «Эковакино»ни ишлаб чиқарувчи Рязандаги «Вакинский агро» корхонаси билан боғланиб Путин учун махсус кефир ишлаб чиқарасизми, деб сўрашди. Корхона Путин уларнинг маҳсулотини истеъмол қилишини филмдан билгани, у учун алоҳида партия ишлаб чиқарилмаслигини айтган.

Агро мутахассисларга кўра, бу корхона маҳсулотининг асосий устунлиги улар сутни ўз фермасида ишлаб чиқаришидир. Кефир идишида ҳам «своя ферма» деган ёзув ажратиб ёзилган. Яъни бу корхона бошқалардан сут сотиб олиб қайта ишламайди, фақат ўз фермасидаги сигирлар сутини ишлатади.

Экспертлар «Эковакино» зардобли қатиғи юмшоқ экани, унда нормадагидан ҳам камроқ ачитқи солиниши, корхона қадоқлаш ва стириллаш жараёнини тўлиқ автоматлаштиргани маҳсулотдан зарарланиш эҳтимолини максимал камайтиришини эътироф этган.

Путиннинг вориси...

Энди кефир ва мураббодан сиёсатга ўтсак. Кўрсатув давомида Путин айтган энг муҳим гап унинг вориси ҳақида бўлди. Албатта, Путин фалон одам менинг ворисим бўлади деб айтмаган, кимгадир ишора ҳам қилмаган. Лекин Зарубиннинг кейинги [президент] ким бўлади деб ўйлайсизми, деган саволига жавоб бераркан ўзида «номзодлар шортлисти» борлигига ишора қилган. Ҳатто уларнинг фаолиятини кузатиб баҳолаб боришини ҳам тасдиқлаган.

Ядро қуроли ҳақида

Айтганча, Путиннинг яна бир гапини эътибордан четда қолдирмаслик керак. 4 май оқшомида эфирга узатилган кўрсатувда Россия президенти уруш бошланганидан буён Москвада ядро қуролидан фойдаланиш зарурияти бўлмаганини айтиб, келгусида ҳам бунга эҳтиёж туғилмаслигига умид билдирган. Ваҳоланки, Россия уруш давомида Украинага қарши ядро қуролидан фойдаланиш масаласини бир неча бор кўтарди. Ҳатто Киевга зарба бериш учун ҳуқуқий тўсиқларни олиб ташлаб, бутун бошли ядро доктринасини ўзгартирди, Беларус ҳудудига ядровий жанговар каллаклар жойлаштирилди.

Хуллас, ана шунақа гаплар. 1 соат-у 15 дақиқалик ҳужжатли филмнинг барча тафсилотларини айтиб берсак, унинг қизиғи қолмайди. Яхшиси уни томоша қилинг, шунчаки эмас, диққат билан томоша қилинг.

«Замин»ни Telegram’да ўқинг!