«Одатдан – шахсиятга»: Путиннинг ёшликда шаклланган одати ҳозир ҳам ўзгармаган

Яқинда эфирга узатилган «Россия. Кремль. Путин. 25 йил» номли ҳужжатли фильмда Россия президенти Владимир Путин ўзининг спорт залидаги шахсий машғулот жойини намойиш этди. Аммо томошабинларни янада ҳайратга солган жиҳат — Путиннинг спорт хоналаридан чиқар экан, чироқни ўчириб кетгани бўлди. Бу кичик, лекин маънодор ҳаракат кенг жамоатчиликда қизиқиш уйғотди.

Путиннинг бу одати тасодифий эмас. Унинг синфдоши ва яқин дўсти Виктор Борисенко «КП-Петербург» газетасига берган интервьюсида шу ҳақда тўхталиб ўтди. Унинг сўзларига кўра, Путин бу ҳаракатни ҳали болаликдан ўрганган — бу ундаги масъулият туйғуси ва тарбиявий муҳитнинг самараси.

Борисенконинг таъкидлашича, Путин болалигини Ленинграддаги коммунал квартираларда ўтказган. У пайтларда бир неча оила бир хонадонда яшагач, электр тўловлари ҳам умумий бўларди. Шундай шароитда агар кимдир хонани ёритиб қўйса ва уни ўчирмасдан чиқса, бошқа қўшнилар бундан норози бўлиши турган гап. Шу сабабли, болаларга ҳам чироқни ўчириш одат қилиб ўргатиларди. Путин эса бу одатни катта бўлгач ҳам унутмаган.

«Владимир ўшандаёқ ҳар қандай юмушда тартиб ва эҳтиёткорликка риоя қиларди. У ҳатто ёруғликни ҳам бекорга исроф қилмаслик кераклигини яхши биларди. Унинг чироқни ўчириб кетиши — тарбия ва ўтмиш хотираларининг ифодаси», — деди Борисенко.

Бундай оддий, аммо ахлоқий маънога эга бўлган одат мамлакат етакчисининг шахсий фазилатларидан бири сифатида қабул қилинмоқда. Россиядаги кўплаб ижтимоий тармоқ фойдаланувчилари бу ҳолатни «ижтимоий масъулият тимсоли» деб аташди.

Путиннинг бу ҳаракатига фақат ишончли раҳбар сифатида эмас, балки оддий инсон сифатида ҳам қарайдиганлар сони ортиб бормоқда. Энергияни тежаш, ресурсларга эҳтиёткор муносабат ва тартиб — булар президент учун болаликдан бошланган ҳаёт фалсафасининг бир қисми экани яна бир бор кўзга ташланди.

Бу кичик детал ортида катта маъно бор: одамнинг асли кимлиги унинг оддий одатларида акс этади. Путин мисолида эса бу одат нафақат шахсий, балки миллий даражадаги фазилат сифатида намоён бўлмоқда. «Замин»ни Telegram’да ўқинг!