Путин ўт очишни тўхтатди, лекин ҳужумлар тўхтамади: Украина Россияни айбламоқда

Россия Федерацияси президенти Владимир Путин Ғалаба куни муносабати билан уч кунлик вақтинча ҳарбий ҳаракатларни тўхтатишга қарор қилганига қарамай, Украина томонидан Россия томонидан амалга оширилган ҳужумлар ҳақида расмий маълумотлар тарқалмоқда.

Украина ҳарбий-ҳаво кучлари ўзининг расмий Telegram канал орқали тарқатган маълумотга кўра, 8 май куни кечаси, пайшанбага ўтар тун Суми вилояти йўналишида Россия тактик авиацияси томонидан бошқариладиган ҳаво бомбаларидан фойдаланилган. Шунингдек, мамлакатнинг фронт яқинида жойлашган бир қатор вилоятларида ҳаво қуролларидан фойдаланиш эҳтимоли юқори экани ва таҳдид ҳали ҳам сақланаётгани таъкидланди.

Ҳозирча ҳужумлар оқибатида йўқотишлар ёки зарарлар ҳақида расмий маълумотлар эълон қилинмаган. Лекин Украина ҳарбийлари Россия томонидан қўлланилаётган ҳарбий фаолиятни хавфли деб баҳоламоқда.

Шу билан бирга, шу кечаси Украина осмонида Россияга тегишли бирорта ҳам дрон аниқланмагани қайд этилди. Украина томони ҳам бу гал дронлар орқали Россия ҳудудларига ҳеч қандай оммавий ҳужум уюштирмаган, фақат айрим учувчисиз учоқлар ҳаракати ҳақида алоҳида хабар берилди.

Хусусан, Липецк вилояти раҳбари Игор Артамонов 8 майга ўтар кечаси вилоят ҳудудига дрон ҳужуми хавфи ҳақида огоҳлантирган. Унинг баёнотига кўра, хавфнинг олдини олиш чоралари кўрилмоқда.

Бундан ташқари, Нижний Новгород шаҳрида жойлашган аэропорт 8 май куни тонг соат 04:30 да «парвоз хавфсизлигини таъминлаш мақсадида» вақтинча ёпилгани ҳақида Федерал ҳаво транспорти агентлиги маълум қилди. Бу чора Украина дронларининг Россия ва Москва томон йўналтирилган олдинги оммавий ҳужуми оқибатида қабул қилинган. Ушбу ҳужумлар Россия аэропортларининг фаолиятида жиддий узилишларга сабаб бўлган ва камида 60 минг йўловчи ўз сафарларидан зарар кўрган.

Маълумот учун, Владимир Путин эълон қилган вақтинча ўт очишни тўхтатиш келишуви 8 май куни Москва вақти билан соат 00:00 дан бошланиб, 11 май куни соат 00:00 гача амал қилиши керак эди. Лекин Украина президенти Володимир Зеленский бу таклифни рад этган. У Киев томони фақат камида 30 кунлик тўлиқ ва аниқ сулҳга тайёр эканини маълум қилган.

Мухтасар қилиб айтганда, Ғалаба кунига бағишланган тинчлик ташаббуслари ҳақиқий амалий қадамларга айланиши учун ҳали кўп саъй-ҳаракатлар талаб этилади. Ҳар икки томоннинг ҳам турлича ёндашуви жанглар тақдири ва тинчлик жараёнига жиддий таъсир кўрсатиши турган гап. «Замин»ни Telegram’да ўқинг!