Трамп Зеленскийнинг 30 кунлик оташкесим таклифини қўллаб-қувватлади

АҚШ президенти Доналд Трамп Украинадаги қуролли тўқнашувларни тўхтатиш бўйича навбатдаги муҳим баёнот билан чиқди. У Украина раҳбари Владимир Зеленскийнинг Кремлга қаратилган 30 кунлик ўт очишни тўхтатиш таклифини қўллаб-қувватлашини маълум қилди ва Россияга огоҳлантирув йўллади.

Трамп 8 май куни Truth Social ижтимоий тармоғидаги саҳифасида шундай ёзди:
"Агар оташкесим режаси амалга ошмас экан, АҚШ ва унинг халқаро ҳамкорлари Россияга нисбатан янада қаттиқ иқтисодий санкциялар жорий қилади".

Унинг баёноти, шубҳасиз, асосий равишда Москвага қаратилиб, АҚШнинг тинчлик жараёнидаги қатъий позициясини яна бир бор намоён этди.

Трамп: "Бу муваққат эмас, доимий тинчлик бўлади"

Трампнинг таъкидлашича, у Европа иттифоқи давлатлари билан биргаликда Россия ва Украина ўртасида барқарор тинчлик ўрнатиш устида иш олиб бораётганини билдирган.

"Бу жараён вақтинча эмас, балки доимий тинчлик билан якунланиши керак. Оташкесим ана шу тинчлик келишувининг биринчи қадамига айланиши лозим", — дея қўшимча қилди Оқ уй раҳбари.

Зеленскийдан 30 кунлик оташкесим таклифи

Маълумот ўрнида, 7 май куни кечқурун Украина президенти Зеленский Кремлга мурожаат йўллаб, барча ҳарбий ҳаракатларни камида 30 кунга тўхтатишни таклиф қилган эди. Бу таклиф Кремл томонидан ҳалигача расман рад этилмади, аммо жавоб ҳам берилмади.

Ушбу баёнот Путин томонидан 8 майдан 11 майгача эълон қилинган уч кунлик оташкесимнинг амалга киришидан бир неча соат аввал берилди. Россия томони бу оташкесимни Ғалаба кунига бағишлаганини билдирган эди.

Босим ошмоқда: Трамп жамоаси тайёр

Май ойи бошида Bloomberg агентлиги тарқатган хабарларга кўра, Трамп маъмурияти Россияга иқтисодий босимни кучайтириш мақсадида бир неча сценарийни тайёрлаб қўйган. Уларда Путиннинг урушни сунъий равишда чўзиб келаётгани таъкидланган.

Zamin.uz таҳририяти АҚШ ва Европа томонидан Россия-Украина можаросини дипломатик йўллар билан ҳал этиш бўйича ташланадиган ҳар қандай жиддий қадамларни эътибор билан кузатишда давом этади. Сиёсий босимлар, дипломатик таклифлар ва халқаро фаолиятлар натижаси қандай бўлиши — яқин кунларда маълум бўлади. «Замин»ни Telegram’да ўқинг!