Зеленскийдан 80 йиллик мурожаат: “Россия ўзини фашизм каби тутаяпти – демилитаризация шарт”

8 май куни, Европа мамлакатларида Иккинчи жаҳон уруши якунланганининг 80 йиллиги муносабати билан Украина президенти Володимир Зеленский халққа видеомурожаат билан чиқди. Президент Киев марказидаги Хрешчатик кўчаси бўйлаб юриб, шахсий камера орқали видеомурожаат тайёрлади ва жаҳон жамоатчилигига мурожаат қилди.

“Украина нацизмни енгишда ҳам кураш майдонида эди, энди ҳам шундай”

Мурожаатнинг марказий мавзуси — Украина фақат тарихда эмас, балки бугунги кунда ҳам Европанинг озодлиги учун кураш олиб бораётган мамлакат эканига урғу бериш бўлди. Зеленский таъкидлашича, 8 миллиондан ортиқ украиналик Иккинчи жаҳон урушида ҳалок бўлган ва бу фожеа ҳар бир оиланинг хотирасида яшаб турибди.

“Ҳар бир уйда расм бор. Бу нафақат хотира, балки ҳушёрлик ва сабоқдир. Биз ўз тарихимизни эслаймиз ва ҳимоя қиламиз”, — деди Украина раҳбари.

Москва паради — “биз буни яна қила оламиз” шиори остида

Зеленскийнинг мурожаатида, айниқса, Россиянинг 9 май куни ўтказиши кутилган анъанавий ҳарбий парад кескин танқид остида бўлди. Президент буни “биз буни яна қила оламиз” шиорига боғлаб, параднинг тарихи ва маънавий моҳияти бузиб кўрсатилаётганини таъкидлади.

“Бучада оммавий қабрлар ташкил этганлар фашизм ҳақида гапирмоқда. Мариуполни блокада қилганлар Ленинград блокадасини эслашмоқда. Улар тарихни фақат қайтариш учун эмас, балки уни таҳқирлаш учун ишлатяпти”, — дея сўзларини шиддат билан айтди Зеленский.

“Агар Россия ўзгармаса — уни демилитаризация қилиш керак”

Зеленский сўнгги фикрларини янада кескин тарзда ифода этди. Унга кўра, агар Россия ўз сиёсатини ўзгартирмаса, халқаро ҳамжамият уни “демилитаризация қилиш” масаласини кўриб чиқиши шарт.

“Россия ўзини ўзгартиради ёки уни тўхтатиш учун бутун дунё ҳаракат қилади. Уруш, тажовуз ва фашизм белгиларини такрорлайдиган тузумга қарши жавоб талаб этилади”, — деди у.

Европа, жумладан, дунё ўзгариш остонасида турибди — тинчлик ва адолат ўртасидаги кураш ҳали ҳам давом этмоқда. «Замин»ни Telegram’да ўқинг!