Украина Венгрия ҳарбий разведкасининг яширин тармоғини фош қилди

Украина Хавфсизлик хизмати (СБУ) мамлакат тарихида илк бор Венгрия ҳарбий разведкасининг яширин тармоғини аниқлаганини маълум қилди. Бу ҳақда СБУ махсус баёнот бериб, фош этилган жосуслик тармоғи мамлакатнинг миллий хавфсизлигига жиддий таҳдид солганини таъкидлади.

СБУ томонидан маълум қилинганидек, ушбу разведка тармоғи Закарпатя вилоятида фаолият кўрсатган. Улар бу ҳудудда жойлашган С-300 ҳаво мудофаа тизимларининг координаталарини, тизимдаги заиф нуқталарни аниқлаш билан шуғулланган. Бундан ташқари, ушбу агентлар маҳаллий аҳолининг ижтимоий-сиёсий қарашларини синчковлик билан ўрганиб, Венгриянинг эҳтимолий ҳарбий босқинига нисбатан муносабатини аниқлашга ҳаракат қилишган.

Украина хавфсизлик хизматлари, шунингдек, ушбу тармоқ мамлакат қуролли кучларининг Россия билан давом этаётган урушдаги йўқотишлари ва фронтдаги вазият ҳақида ҳам мунтазам равишда маълумот тўплаганини қайд этган. Ушбу разведка фаолияти доирасида икки шахс қўлга олинган. Улардан бири 40 ёшли украиналик собиқ ҳарбий бўлиб, унинг 2021 йилда Венгрия ҳарбий разведкаси томонидан ёллангани ва сўнгра «кутиш режимига» ўтказилгани маълум қилинди. Уларнинг куратори эса Венгрия ҳарбий разведкасининг юқори мартабали мансабдори эканлиги айтилмоқда.

Шунингдек, мазкур воқеа халқаро муносабатлар соҳасида дипломатик можарони келтириб чиқарди. Reuters агентлигининг хабар беришича, Венгрия ташқи ишлар вазири Петер Сийярто Украина томонидан эълон қилинган бу маълумотни «Украина пропагандаси» деб атаб, унга эҳтиёткорлик билан ёндашиш лозимлигини таъкидлади.

Бироқ, Сийярто тез орада жосуслик фаолияти билан шуғулланганликда гумон қилинган икки украиналик дипломат Венгрия ҳудудидан чиқариб юборилишини маълум қилди. Бу эса икки давлат ўртасидаги вазиятни янада кескинлаштириши мумкин.

Экспертларнинг фикрича, ушбу воқеа Украина ва Венгрия ўртасидаги дипломатик муносабатларга жиддий таъсир кўрсатиши эҳтимоли бор. Ҳозирда халқаро ҳамжамият вазиятнинг кейинги ривожини диққат билан кузатмоқда. «Замин»ни Telegram’да ўқинг!