Европа етакчилари Киевга йўл олди — Россияни 30 кунлик тўлиқ оташкесимга чақириш режада

Украинанинг Европадаги асосий ҳамкорлари сиёсий тарихда кам учрайдиган ташаббусга қадам ташлашмоқда. 10 май, шанба куни Франция, Германия, Буюк Британия ва Польша етакчилари — Эммануэл Макрон, Фридрих Мерц, Кир Стармер ва Доналд Туск бир вақтнинг ўзида Киевга ташриф буюришмоқда.

Улар Украина президенти Володимир Зеленский билан музокаралар ўтказиши ва Россияни 30 кунлик шартсиз отишмани тўхтатишга рози бўлишга чақириши кутилмоқда.

“Украина учун. Европа учун”

Ташриф расман эълон қилинган пайтда, Франция президенти Макрон туртлик етакчиларнинг қўшма фотосуратини ижтимоий тармоқда чоп этди. Унга тўртта тилда (француз, инглиз, немис ва поляк) шундай сатр ёзилган эди:
“Биз Киевга кетяпмиз. Украина учун. Европа учун.”

Бу сатр фақат ташриф эмас, балки сиёсий ягона позиция ифодаси сифатида талқин қилинмоқда.

Бир вақтдаги ташриф — дипломатияда кам учрайдиган воқелик

AFP агентлиги таъкидлашича, тўрт Европа етакчисининг Украинага бир вақтнинг ўзида келишлари тарихда мисли кўрилмаган ҳолатдир. Бу ҳаракат Европа Иттифоқи давлатлари ўртасида Украинага нисбатан муросасиз қўллаб-қувватлашнинг яна бир белгиси сифатида баҳоланмоқда.

АҚШ ҳам босимни кучайтирмоқда

Европа ташаббусини АҚШ президенти Дональд Трамп ҳам қўллаб-қувватламоқда. 8 май куни у Зеленский билан суҳбатдан сўнг, АҚШ Россиядан 30 кунлик тўлиқ отишмани тўхтатишга рози бўлишни талаб қилишини билдирган.

Янги санкциялар хавфи остонада

Бундан бир кун олдин, Reuters агентлиги ўз дипломатик манбаларга таяниб хабар берган эди:
АҚШ ва Европа Иттифоқи Москвага 30 кунлик отишмани тўхтатиш таклифини тайёрламоқда. Агар Россия ушбу ташаббусни рад этса, у ҳолда янги иқтисодий санкциялар жорий қилиниши мумкин.

Zamin.uz таҳририяти Европа ва АҚШнинг умумий босими орқали тинчлик музокараларига йўл очилиши эҳтимолини диққат билан кузатмоқда. Бу ташриф нафақат дипломатик рамз, балки тинчлик учун жиддий сиёсий босимнинг ифодасига айланиши мумкин. «Замин»ни Telegram’да ўқинг!