Она ва ўғил биргаликда университетни битириб, орзуларига эришди

Ҳаётда инсон учун энг муҳим ва унутилмас онлардан бири – шубҳасиз, университетни тамомлашдир. Бу бахтли лаҳзани АҚШнинг Техас штатида яшовчи она ва ўғил биргаликда нишонлаш бахтига муяссар бўлишди.

Fox 4 News нашрининг маълум қилишича, Техаслик Бренди Филдс ва унинг ўғли Кайл Филдс узоқ ва машаққатли таълим йўлини муваффақиятли якунлаб, биргаликда магистрлик дипломларига эга чиқдилар.

Она Бренди Филдс бизнес бошқаруви бўйича магистрлик дипломини олган бўлса, унинг ўғли Кайл Филдс эса санъат соҳасида магистр унвонига эришган. Улар учун бу кун нафақат катта ютуқ, балки оила бирдамлиги ва биргаликдаги меҳнатларининг ёрқин намунаси бўлди.

«Ўғлим билан биргаликда диплом олишни хаёлимга ҳам келтирмаган эдим. Бундай ажойиб воқеа ҳаётимизнинг энг бахтли ва унутилмас лаҳзасига айланди. Биз иккиламиз ҳам тунлари ухламай дарс тайёрлардик, қийинчилик ва синовларга дуч келсак ҳам, бир-биримизни доимо қўллаб-қувватлаб турдик. Саҳнага бирга чиқиб диплом олиш – оиламиз учун ғурур ва шодликнинг рамзи бўлди», деди Бренди ўзининг ҳис-туйғулари билан ўртоқлашар экан.

Аслида, Бренди учун бу йўл жуда осон кечмади. Унинг таъкидлашича, у аввал ҳам университетни бир неча марта тамомлашга ҳаракат қилган, аммо турли сабабларга кўра бу ишларни охирига етказа олмаган. Шу сабабли, кўп йиллик танаффусдан кейин яна таълим жараёнига қайтиш осон бўлмаганини тан олди. Бироқ, ўғли билан бирга ушбу йўлни босиб ўтиш унга куч ва илҳом бағишлаган.

Брендининг ўғли Кайл эса университетни битириб, ҳаётида янги босқичга қадам қўйганидан жуда мамнун. У ҳозирда Техас насронийлар университетининг спорт жамоасида менежер сифатида фаолият олиб бормоқда ва келажагини ҳам айнан шу соҳада кўрмоқда.

«Спорт ҳар доим ҳаётимнинг ажралмас қисми бўлган. Ўқишни битиргач ҳам айнан шу соҳада ишлашни режалаштирганман. Катта орзуим – дунёга машҳур Nike компаниясида иш бошлаш ва профессионал жиҳатдан янада ўсишдир», деди Кайл Филдс.

Шундай қилиб, она ва ўғил биргаликдаги кучли ирода, меҳнат ва ўзаро ёрдам билан ўзларининг энг катта орзуларидан бирига эришдилар. Уларнинг бу ютуғи кўплаб оилаларга намуна бўлиб, ҳар қандай мақсадга меҳнат ва ишонч билан эришиш мумкинлигини яна бир бор исботлади. «Замин»ни Telegram’да ўқинг!