Жамму ва Кашмирда портлашлар: Ҳиндистон ва Покистон ўртасидаги отишма қайта авж олдими?

10 май куни Жамму ва Кашмир ҳудудида яна қўрқинчли портлашлар ва отишма овозлари эшитилди. Ҳудуд пойтахти Сринагар марказидаги ҳаво мудофаа бўлинмалари фаоллашди. Бу ҳақда маҳаллий ҳокимият раҳбари Умар Абдулла ўзининг ижтимоий тармоқдаги саҳифасида маълум қилди.

“Бу оташкесим эмас. Сринагар марказидаги мудофаа кучлари ҳозиргина ўқ узди”, — деб ёзди у.

Покистон томонидан келишув бузилдими?

The Indian Express нашрига кўра, Покистон бир неча чегара ҳудудларида миномётлар ва автоматлардан ўт очган. Айниқса, Удҳампур шаҳри ҳужумга учраган, деб хабар берилади. Шунингдек, Жамму ва Кашмир, Ражаҳстан ва Панжоб штатларида дронлар кузатилган.

Оқибатда Панжобдаги чегара ҳудудларида электр таъминоти узилиб қолган. Бу эса можаро фақат ҳарбий эмас, инфратузилмага ҳам таъсир кўрсатаётганини кўрсатади.

Ҳиндистон жавобсиз қолдирмаяпти

Ҳиндистон ташқи ишлар вазири Викрам Мисри сўнгги соатларда Покистон томонидан келишувнинг бир неча бор бузилганини таъкидлади.

“Қуролли кучларимиз бу қоидабузарликларга муносиб жавоб бермоқда. Биз буни жуда жиддий қабул қиламиз ва Покистонни вазиятга масъулият билан ёндашишга чақириб қоламиз”, — деди у.

Мисрининг айтишича, армияга кейинги ҳужумларнинг олдини олиш учун қатъий ва масъулиятли чоралар кўриш юзасидан топшириқ берилган.

Трамп эълон қилган оташкесим – ҳужжатда, амалда эмас?

10 май куни соат 17:00 дан бошлаб Ҳиндистон ва Покистон ўртасида отишни тўхтатиш режими амалга кириши ҳақида дастлаб АҚШ президенти Дональд Трамп маълум қилган эди. Кейинроқ бу маълумотни Ню-Деҳли ва Исломобод ҳам тасдиқлаган.

Бироқ воқеалар шиддати ушбу келишув ҳозирча ҳудудда амалий кучга эга эмаслигини кўрсатмоқда.

Жамму ва Кашмир – яна тўқнашув марказида

Можаро 7 майга ўтар кечаси янада кучайди. Ҳиндистон назоратида бўлса-да, Покистон даъво қилаётган Жамму ва Кашмирда содир этилган террористик ҳужум юзасидан Ҳиндистон:

• Покистонда жойлашган «Лашкари-Тойба» террор гуруҳи билан боғлиқ деб ҳисобланган Қаршилик фронтини (TRF) айблади;
  
• Ушбу тузилма 26 кишини отиб ўлдирганини маълум қилди;
  
• Ню-Деҳли воқеага Исломобод бевосита алоқадор, деб баёнот берди, бироқ Покистон барча айбловларни рад этди.
  

Zamin.uz таҳририяти Жамму ва Кашмирдаги ҳолатни минтақа тинчлиги учун жиддий хатар сифатида баҳолайди. Ҳозирги вазиятда икки давлатнинг сиёсий иродаси, халқаро воситачиларнинг таъсири ва жаҳон ҳамжамиятининг босими ҳар қандай келишувнинг ҳақиқий амалга ошишига замин ярата олади ёки можарони янада авж олдириши мумкин. «Замин»ни Telegram’да ўқинг!