Путин тўғридан-тўғри музокараларни бошлашни таклиф этди — Украина қандай жавоб қайтаради?

Россия президенти Владимир Путин 11 май куни кечаси Кремлдаги чиқиши чоғида Украина билан тўғридан-тўғри музокараларни ҳеч қандай дастлабки шартларсиз 15 май куни Истанбулда бошлашни таклиф этди. Ушбу таклиф Россиянинг жанубий қўшниси билан тинчлик жараёнини қайта бошлашга тайёр эканини яна бир бор тасдиқлади.

“Киев расмийларига 2022 йил охирида тўхтатилган музокараларни қайта бошлашни таклиф қиламиз. Бу галги учрашув ҳам олдинги каби Истанбулда бўлиб ўтиши мумкин”, — деди Путин.

Эрдўғандан воситачилик кутилаяпти

Путин сўзларига кўра, у яқин кунларда Туркия президенти Ражаб Тоййиб Эрдўған билан алоқа ўрнатиб, музокаралар учун шарт-шароит яратишда Анқарадан дипломатик кўмак сўрайди:

“Эртага президент Эрдўған билан суҳбатлашамиз. Мен ундан Украина бўйича тинчлик музокараларини ташкил этишда ёрдам сўрайман.”

“Жиддий музокараларга тайёрмиз”

Россия раҳбари таъкидлашича, музокараларнинг асосий мақсади — конфликтнинг илдиз сабабларини бартараф этиш ва узоқ муддатли, барқарор тинчликка эришиш бўлиши керак:

“Агар музокаралар бошланса, янги отишни тўхтатиш ёки сулҳ шартлари ҳам муҳокама қилиниши мумкин.”

Украина — оташкесимга тайёр, Ғарб эса кузатмоқда

Путиннинг баёнотидан бир кун аввал, 10 май куни Киев расмийлари Франция, Польша, Британия ва Германия етакчилари билан учрашувдан сўнг 30 кунлик тўлиқ ва шартсиз оташкесимга тайёр эканини эълон қилган эди.

Эслатиб ўтамиз, Франция президенти Эммануэль Макрон, Польша бош вазири Доналд Туск, Британия бош вазири Кир Стармер ва Германия мухолифати етакчиси Фридрих Мерц Киевдаги “Кўнгиллилар коалицияси” саммитида иштирок этишганди.

Стармер: “Агар тинчлик ҳақида ўйлаяпсизми, бу — энг тўғри вақт”

Киевдаги музокаралардан сўнг ўтказилган матбуот анжуманида Британия бош вазири Кир Стармер қуйидагича баёнот берди:

“Агар Путин ҳақиқатда тинчлик ҳақида ўйлаяпти десангиз, буни кўрсатиш учун ҳозир — энг тўғри вақт. Аммо у тинчлик ўрнига шартлар қўйяпти, ҳарбий парадлар ўтказяпти. Агар Путин тинчликни рад этса, биз жавоб қайтарамиз.”

Стармер, шунингдек, АҚШ президенти Дональд Трамп билан биргаликда Украинанинг мудофаа салоҳиятини янада мустаҳкамлаш, ва Россияни музокара столига олиб келиш учун ҳаракатлар давом эттирилишини маълум қилди.

Zamin.uz таҳририяти Россия томонидан Истанбулда музокараларни қайта бошлаш таклифи — бу янги сиёсий импульсми ёки ташвиқот элементи эканини кузатишда давом этади. Ҳар ҳолда, ушбу ташаббус жаҳон ҳамжамиятини яна бир бор Москва ва Киевни тинчлик йўлига қайтариш имконияти билан юзма-юз қилмоқда. «Замин»ни Telegram’да ўқинг!