Дунёдаги энг бахтли шаҳарлар рейтинги эълон қилинди: кучли ўнликда қайси шаҳарлар бор?

Happy City Index халқаро ташкилоти томонидан анъанавий тарзда эълон қилинадиган йиллик рейтинг натижаларига кўра, Дания пойтахти Копенҳаген 2025 йилда рекорд даражада юқори – 1039 балл билан дунёдаги энг бахтли шаҳар сифатида биринчи ўринни эгаллади.

Мутахассисларнинг фикрича, Копенҳагеннинг рейтингда пешқадам бўлиши кутилмаган ҳолат эмас, балки шаҳарда йиллар давомида олиб борилган аниқ сиёсий ва ижтимоий қарорлар натижасидир. Ушбу шаҳар юқори даражада барқарор ривожланишга эга бўлиб, атроф-муҳит тозалиги, экологик жиҳатдан қулай транспорт тизими ва шаҳар аҳолисининг саломатлиги учун қулай инфратузилма билан ажралиб туради.

Қайд этилишича, Копенҳагендаги саёҳатларнинг деярли 70 фоизи велосипед ва жамоат транспорти орқали амалга оширилади. Шу билан бирга, шаҳарда ноёб бўлган «Бахт музейи» мавжуд бўлиб, бу концепцияни илмий ва маданий жиҳатдан кенг ўрганиш имконини беради.

Цюрих – иқтисодий барқарорлик тимсоли

Иккинчи ўринни 993 балл билан Швейцариянинг Цюрих шаҳри қўлга киритди. Ушбу шаҳар иқтисодий жиҳатдан барқарорлиги, юқори сифатли соғлиқни сақлаш тизими ва атроф-муҳитни муҳофаза қилиш бўйича олиб борилаётган илғор сиёсатлари билан катта баҳога лойиқ кўрилди.

Сингапур – Осиёнинг энг бахтли шаҳри

Учликни эса Осиёнинг энг бахтли шаҳри деб тан олинган Сингапур якунлади. 979 балл билан учинчи ўринни эгаллаган бу шаҳарнинг асосий ютуқлари – юқори сифатли таълим тизими, ишсизликнинг йўқлиги даражасидаги паст кўрсаткичлари ва аҳолининг ижтимоий фаоллиги ҳисобланади.

Орхус ва Антверпен ҳам юқори баҳоланди

Кучли бешликдан Даниянинг яна бир шаҳри Орхус (958 балл) ҳам ўрин олди. Орхус кучли иқтисодиёти ва фуқароларнинг бошқарув жараёнларига юқори даражадаги жалб қилиниши билан ажралиб туради. Бешинчи ўрин эса 956 балл билан Бельгиянинг Антверпен шаҳрига насиб этди.

Антверпен бу йил Жанубий Корея пойтахти Сеулни ортда қолдириб, биринчи бешликка киришни уддалади.

Кучли ўнликда яна қайси шаҳарлар бор?

Рейтингнинг энг юқори ўнлигида, шунингдек, Стокҳольм (Швеция), Тайпей (Тайвань), Мюнхен (Германия), Роттердам (Нидерландия) ва Ванкувер (Канада) каби шаҳарлар ўрин олди.

30 таликда эса Вена, Париж, Нью-Йорк, Женева ва Барселона каби машҳур мегаполислар ҳам мавжуд.

Марказий Осиё шаҳарлари 200 таликка ҳам киролмади

Ҳисоботда қайд этилишича, бахтли шаҳар бўлиш учун фақат юқори даромад ёки қулай иқлимнинг ўзи етарли эмас, балки шаҳарнинг инфратузилмаси, соғлиқни сақлаш тизими, экология ва ижтимоий ҳамкорлик йўналишларидаги аниқ ва мукаммал шаҳар сиёсатлари зарурдир.

Бироқ, афсуски, Марказий Осиёдаги мамлакатлар, жумладан, Ўзбекистон, Қозоғистон, Қирғизистон, Тожикистон ва Туркманистон шаҳарлари бу рейтингнинг энг юқори 200 талигига ҳам кира олмаган.

Шунингдек, ушбу рейтингга Озарбайжон, Мўғулистон ва БАА шаҳарлари ҳам киритилмаганлиги таъкидланмоқда.

Zamin.uz таҳририяти халқаро рейтингларни диққат билан кузатиб, сизни дунёдаги энг қизиқарли ва муҳим янгиликлардан бохабар этиб туради. Биз билан қолинг! «Замин»ни Telegram’да ўқинг!