Зеленский Путин билан музокаралар учун Туркияга йўл олмоқда: "Агар Путин Истанбулга учса, биз ҳам учамиз"

Украина президенти Володимир Зеленский Туркияга ташрифи олдидан матбуот анжуманида иштирок этиб, Россия президенти Владимир Путин билан юзма-юз музокаралар ўтказишга тўлиқ тайёрлигини яна бир бор тасдиқлади.

«Мен Путин билан учрашувга тайёрман ва буни бир неча бор такрорлаганман. 2019 йилда у билан юзма-юз кўришганмиз, шунинг учун бу одам ҳақида ва у билан музокаралардан қандай натижалар кутишим мумкинлигини яхши тушунаман. Ҳақиқат ва адолат Украина томонида эканига ишонаман. Бироқ, халқимиз ва одамларимиз манфаатлари учун биринчи қадамни ташлашимиз лозим, деб ҳисоблайман. Биз урушни тугатиш жараёнини бошлаш бўйича камида дастлабки келишувга эришишни хоҳлаймиз», — деди Зеленский.

Украина етакчиси шунингдек, Путиннинг музокараларни тўғридан-тўғри ўтказишга хоҳиши борлигига шубҳа билан қарайди.

«Бу ҳақда мен АҚШ президенти Доналд Трампга ҳам бир неча бор айтганман. Путин, менимча, урушни якунлашни ҳам, ўт очишни тўхтатишни ҳам хоҳламайди. У ҳатто тўғридан-тўғри музокараларга киришишдан қўрқади, деб ҳисоблайман», — деди Украина раҳбари.

Президент Зеленский Туркия президенти Ражаб Тоййиб Эрдўған билан 15 май куни Анқарада учрашувга келишиб олинганини ҳам маълум қилди. Зеленский Путин билан Туркияда музокаралар ўтказишга умид қилаётганини билдирди.

«Россия раҳбарияти учрашув манзили ҳақидаги баҳоналар орқали вазиятни чалкаштирмаслиги учун бир нарсани аниқ айтиб қўймоқчиман: агар Путин Истанбулга келадиган бўлса, биз ҳам Эрдўған билан Истанбулга боришга тайёрмиз. Агар Путин чиндан ҳам реал ҳаётда музокараларга киришиш ниятида бўлса, биз етакчилар даражасида ўт очишни тўхтатиш ҳақидаги келишувга эришиш учун ҳамма нарсани қиламиз. Буни фақат Путин билан келишиб олиш мумкин, чунки урушни тугатиш бўйича якуний қарор унинг қўлида», — дея таъкидлади Зеленский.

Украина президенти музокаралар олиб бориш ҳуқуқи ва мажбурияти ўзининг зиммасида эканлигини яна бир бор таъкидлади.

«Украина суверенитети, ҳудудий яхлитлиги ва истиқболини муҳокама қилиш ҳуқуқи фақат менда. Бунинг учун мен музокараларни тақиқлаш ҳақидаги фармонни бекор қилишим шарт эмас, чунки мен ўзимга ҳеч нарсани тақиқламаганман. Бу Путиннинг ўз нарративидир. Мен учун энг муҳим натижа – ўт очишни тўлиқ ва сўзсиз тўхтатишдир. Агар Путин Истанбулга келмаса ва бу масалада яна ўйин қилишда давом этса, бу унинг урушни якунлашга тайёр эмаслигини кўрсатади. Бу ҳолатда АҚШ ва Европа иттифоқидан Россияга қарши ваъда қилинган энг қаттиқ санкциялар пакетини амалга оширишларини талаб қиламиз», — деб сўзини якунлади Зеленский.

Янгиликлар