Путин борса, Трамп ҳам боради: Истанбулда катта учрашув бўладими?

Эртагаёқ Путин, Зеленский ва Трамп Истанбулда учрашиши, агар бу содир бўлса, Украинадаги қирғинбарот тугаши мумкин. Зеленский бориши аниқ, Трамп ҳам бормоқчи, Путин-чи?

Баёнотлар жанги

15 май куни Туркияда ўтажак учрашув жуда қизиқ ташкил бўлди. Бу учрашув атрофида ҳақиқий баёнотлар жангини кўрдик. Демак, нимадан бошланди: аввалига Владимир Путин 10 май куни ярим кечаси баёнот бериши айтилди. Россия пропагандасида «Путиннинг чиқиши Америкадаги прайм таймни портлатиши» айтилди. Биласиз, Путин айнан Америкада ҳамма телевизор кўрадиган вақтда чиқиш қилишни яхши кўради.

Хуллас, ярим кечаси хорижий ва маҳаллий журналистлар Кремлда Путиннинг чиқишини кутди. Бу матбуот анжумани бўлади дейишганди, лекин Песков Путинга ҳеч ким савол бермаслиги, фақат у гапиришини айтиб қолди. Кейин Путин чиқиб Украинага 15 май куни Туркияда тўғридан тўғри музокара ўтказишни таклиф қилди.

Шу тариқа биринчи қадамни Путин ташлади. Кўп ўтмай Доналд Трамп телефонини олди-да, Truth ижтимоий тармоғидаги пости орқали ишга киришди. Украинадан Россиянинг тўғридан тўғри учрашиш таклифини қабул этишни талаб қиламан, деди Трамп. АҚШ президенти нодир металлар бўйича стратегик келишув имзоланганидан кейин илк марта Киевга очиқ босим қилди. Кейин навбат Зеленскийга келди.

«Фақат Путинни кутаман»

Баёнотлар жангига якуний нуқтани Украина президенти Володимир Зеленский қўйди. Русчасига айтганда бу чинакам «жирный точка» бўлди. «Пайшанба куни Истанбулда Путинни кутаман. Кўрамиз, Россия бу гал қандай баҳона топаркин», деди Зеленский. Бу жуда кучли чиқиш бўлди. Зеленский очиқчасига Путинни яккама-якка учрашувга чақирди.

Украина президенти кейинчалик бир неча бор чиқиш қилиб, Путинга босим қилди. «Путин мен билан яккама-якка гаплашишга қўрқади», деди хусусан. Путинга сен мендан қўрқасан, дейишганини шахсан мен фақат Алексей Навалнийдан эшитганман. Давлат раҳбарларини-ку қўяверинг, ҳатто Америка президентлари ҳам Путинга юрак ютиб бунақа деёлмаган.

Трамп ҳам боради, агар...

Баёнотлар жангида Трамп яна бир марта иштирок этди. У Истанбулга боришни ўйлаётгани ҳақида пост ёзди. Кейинчалик Трампнинг Украина бўйича махсус вакили Кит Келлог агар Россия президенти Путин ҳам борадиган бўлса, Трамп ҳам Истанбулга учишини айтди.

Энди Россия президентида Туркияга бориб, Зеленский билан яккама-якка учрашишдан бошқа йўл қолмади. Агар бормаса, бу Путин учун катта минус бўлади. Путин Истанбулга бормаса, Трамп Европа Иттифоқи билан бирлашиб, Россияга ўзи ваъда қилган даҳшатли санкцияларни қўллаши мумкин.

Айтиб қўяй, агар чиндан Путин, Трамп ва Зеленский Истанбулда Эрдўған мезбонлигида учрашса, дунёда жиддий ўзгаришлар бўлиши мумкин. Нима деб ўйлайсиз, Путин Истанбулга борадими?


Манба: Kun.uz «Замин»ни Telegram’да ўқинг!