АҚШ Украинадаги можарони ҳал этиш учун Европа тинчликпарвар кучларини жойлаштирмоқчи

Америка Қўшма Штатлари Россия ва Украина ўртасидаги можарони бартараф этиш ва вазиятни барқарорлаштириш мақсадида Днипро дарёсининг ғарбий соҳилида Европа давлатларининг тинчликпарвар кучларини жойлаштириш масаласини муҳокама қилмоқда. Бу ҳақда 13 май куни АҚШ президентининг Украина бўйича махсус вакили Кит Келлог Fox News телеканалига берган интервьюсида хабар берди.

Келлогнинг айтишича, тинчликпарвар миссияда иштирок этиш учун Буюк Британия, Франция, Германия ва Польша каби Европанинг етакчи мамлакатларидан ҳарбий хизматчилар жалб қилиниши режалаштирилмоқда.

"Биз бу ерда чидамлилик кучлари (resilience force) ҳақида гап кетмоқда. Умуман олганда бу E3 деб аталади, лекин Британия, Франция ва Германия билан бирга Польша ҳам иштирок этгани боис бу кучларни аслида E4 деб ҳисоблаш мумкин. Улар Днипро дарёсининг ғарбий қисмини назоратга олади, бу эса ҳарбий ҳаракатларнинг алоқа зонасидан ташқарига чиқишини таъминлайди", – деди Кит Келлог ўз интервьюсида.

АҚШ махсус вакили биринчи навбатда можаро тарафлари ўртасида тўлиқ сулҳга эришиш зарурлигини урғулаб, бу босқичдан сўнг томонлар бошқа муҳим масалалар – алоҳида ҳудудлар мақоми, Запорижжя атом электр станциясининг хавфсизлиги, украиналик болаларнинг ўз юртларига қайтиши ва Украинанинг НАТО аъзолиги масаласини муҳокама қилишлари лозимлигини таъкидлади.

Шу куни Reuters ахборот агентлиги учта ишончли манбага таянган ҳолда, АҚШ президенти Доналд Трамп Кит Келлог ҳамда бошқа махсус вакил Стив Уиткоффни Россия ва Украина ўртасида 15 май куни Истанбулда бўлиб ўтадиган музокараларга кузатувчи сифатида юборишини маълум қилди. CNN эса ушбу маълумотга аниқлик киритиб, икки махсус вакилнинг асосан кузатувчи ролини бажаришини таъкидлади.

Мутахассисларнинг таъкидлашича, Европа тинчликпарвар кучларининг Украинадаги вазиятга аралашуви, можаро томонлари ўртасидаги ишончни тиклаш ва минтақадаги тинчликни таъминлашда муҳим қадам бўлиши мумкин. «Замин»ни Telegram’да ўқинг!