Моди терроризмга қарши курашда мамлакатнинг ягона позициясини олқишлади ва «Синдуур» операциясида қуролли кучларнинг муваффақиятини юқори баҳолади

«Террор ва музокара бирга мавжуд бўла олмайди. Террор ва савдо бирга мавжуд бўла олмайди. Сув ва қон бир оқимда оқмайди», — Ҳиндистон бош вазири Нарендра Моди.

Ҳиндистон бош вазири Нарендра Моди ўзининг халққа ёрқин мурожаатида мамлакатнинг қуролли кучлари, разведка хизматлари ва олимларига самимий миннатдорлик билдирди ҳамда «Синдуур» операциясида уларнинг мисли кўрилмаган жасорати ва аниқлигини юқори баҳолади.

Ҳукумат раҳбари ушбу операцияни Ҳиндистоннинг куч-қудрати, сабр-тоқати ва адолатга қатъий содиқлигининг ёрқин мисоли деб атади.

22 апрель куни Пахалгамда диний асосда бегуноҳ фуқаролар ўз оила аъзолари кўз ўнгида ўлдирилган ваҳшийона террористик ҳужумни қоралар экан, Моди бу ҳолатни «террор ва шафқатсизликнинг даҳшатли юзи» деб атади. Унинг таъкидлашича, ушбу воқеа нафақат шахсан уни чуқур яралаган, балки Ҳиндистоннинг бирлигини йўқ қилишга қилинган жирканч уриниш бўлган. «Ушбу террор ҳужумидан кейин бутун мамлакат – диний ва сиёсий фарқларга қарамасдан – қатъий ҳаракатлар учун ягона фронт бўлиб бирлашди», — деди у.

Бош вазирнинг сўзларига кўра, «Синдуур» операцияси шунчаки ҳарбий жавоб бўлиб қолмай, балки миллий ҳис-туйғуларнинг, миллионлаб фуқароларнинг умумий ғазаби ва қатъийлигининг намоёни бўлди. 6 майдан 7 майга ўтар кечаси Ҳиндистон кучлари Покистон ҳудудидаги террорчиларнинг яширин бошпаналари ва тайёргарлик лагерларига аниқ зарбалар берди, бу эса террорчилар ва уларнинг ҳомийлари учун кутилмаган зарба бўлди.

Ҳужумлар натижасида 100 нафардан зиёд машҳур террорчи йўқ қилинди, уларнинг кўпчилиги ўнлаб йиллар давомида Покистонда жазосиз равишда фаолият юритган эди.

«Баҳавалпур ва Муридке каби террор марказлари узоқ вақтдан буён глобал терроризмнинг ўчоғи ҳисобланар эди – улар жиддий зарар кўрди. Уларнинг раҳбарлари Ҳиндистон бундай қатъият билан жавоб беришини тасаввур ҳам қилмаган эди», — таъкидлади Моди. «Ҳиндистон опа-сингилларимиз ва қизларимизнинг "синдуури"га қилинган ҳужумга жавобан террорнинг асосларини йўқ қилди».

Бош вазир Покистоннинг жавоб тариқасида Ҳиндистоннинг фуқаролик инфраструктураси – мактаблар, диний объектлар ва ҳарбий базаларга ҳужум қилишга уринганини билдирди.

Бироқ у Покистоннинг дрон ва ракеталар билан қилинган ҳужумлари Ҳиндистоннинг кучли ҳаво мудофаа тизими орқали осмонда йўқ қилинганини таъкидлади. «Машҳур Покистон авиабазалари жиддий зарар кўрди, ҳарбийлари эса ҳайрат ва тушкунлик ҳолатида қолди», — деди у.

Ҳиндистон томонидан уч кунлик кескин қарши зарбалардан сўнг, 10 май куни Покистон Ҳиндистон ҳарбий операциялари бош директори (DGMO)га мурожаат қилиб, вазиятни юмшатишни сўради ва ҳарбий ҳаракатлар ҳамда террорчиларни қўллаб-қувватлашни тўхтатишга ваъда берди. Ҳиндистон кейинги ҳаракатларни тўхтатишга рози бўлди, аммо Покистоннинг хатти-ҳаракатларини диққат билан кузатиб бориш ҳуқуқини сақлаб қолди. «Биз Покистоннинг ҳар бир қадамини унинг амалига қараб баҳолаймиз», — таъкидлади Моди.

Бош вазир Моди «Синдуур» операцияси Ҳиндистоннинг терроризмга қарши курашида янги стандарт ўрнатганини маълум қилди. У мамлакатнинг янги антитеррор сиёсатининг учта асосий принципини ажратиб кўрсатди:

Қатъий ва мутаносиб жавоб: Ҳиндистон ҳудудидаги ҳар қандай террор ҳужумига қатъий ва адекват жавоб берилади.

Ядровий таҳдидга йўл қўйилмайди: Ҳиндистон террорчилик ҳаракатларини яшириш учун ядровий таҳдиддан фойдаланишга йўл қўймайди.

Давлат ва террор ўртасида фарқ йўқ: террорни қўллаб-қувватловчи давлатлар ва террорчилар бир хил кўрилади.

Террорни давлат даражасида қўллаб-қувватлашнинг далилларига ишора қилиб, Моди Покистоннинг юқори мартабали ҳарбийлари йўқ қилинган террорчиларнинг дафн маросимида иштирок этганини, бу эса Исломободнинг террор билан алоқадорлигини яна бир бор тасдиқлашини таъкидлади.

Моди Ҳиндистоннинг қуролли кучлари — армия, денгиз флоти, ҳаво кучлари ва хавфсизлик хизматлари билан фахрланишини билдирди. У «Ҳиндистонда ишлаб чиқарилган» («Made in India») ташаббуси доирасида яратилган мудофаа маҳсулотларининг муваффақиятини алоҳида таъкидлаб, операция замонавий уруш шароитида маҳаллий қуролларнинг самарадорлигини исботлаганини билдирди.

«Бу операция XXI асрдаги уруш ҳақидаги тушунчаларни ўзгартирди. Бизнинг кучимиз бирлигимизда, террорга қарши қатъийлик эса тинчликка эришишнинг ягона йўлидир», — деди у.

Бош вазир Моди Покистонни террорни қўллаб-қувватлашни давом эттирмасликка чақириб, бу мамлакатнинг қулашига олиб келишини таъкидлади. «Покистон тинчлик истаса, террор инфратузилмасини йўқ қилиши шарт. Бошқа йўл йўқ», — деди у.

У Ҳиндистоннинг халқаро майдондаги ўзгармас позициясини тасдиқлади: Покистон билан ҳар қандай музокара фақат терроризм ва Покистон босиб олган Кашмир (PoK) масалалари бўйича бўлиши мумкин. «Террор ва музокара бирга бўлмайди. Террор ва савдо бирга бўлмайди. Сув ва қон бир оқимда оқмайди», — деб такрорлади у.

Будда Пурнима байрами муносабати билан нутқини якунлар экан, бош вазир Будданинг таълимотига мурожаат қилиб, ҳақиқий тинчлик кучсиз бўлмаслигини таъкидлади. «Ҳиндистон ривожланган давлатга айланиши учун, фуқаролар тинч яшаши керак. Бунинг учун эса зарур бўлганда куч қўллашга тайёр бўлиш лозим», — деди у.

У Ҳиндистон қуролли кучларига ва ҳар бир ҳиндистонликнинг қайсар руҳига ҳурмат билдирди, мамлакатнинг бирлиги, хавфсизлиги ва суверенитетига садоқатини яна бир бор тасдиқлади. «Замин»ни Telegram’да ўқинг!