Трамп: “Путин билан учрашмагунча Украина бўйича музокараларда силжиш бўлмайди”

АҚШ президенти Дональд Трамп Украина масаласидаги тинчлик музокараларида жиддий ўзгариш бўлиши учун Россия президенти Владимир Путин билан юзма-юз учрашув зарурлигини таъкидлади. Бу ҳақда Reuters агентлиги хабар берди.

— Путин билан учрашмаганимизча, ҳеч қандай ўзгариш бўлмайди, — деди Трамп Абу-Дабига қўнишдан олдин Air Force One бортида журналистлар билан суҳбатда. Sky News маълумотига кўра, у ушбу баёнотни спагетти ва гўштли шарчалардан иборат тушлигини якунлаганидан сўнг билдирган.

“Мен бормасам, нега у келиши керак?”

Трамп аввалроқ Туркияда ўтадиган Россия–Украина музокараларига Путиннинг келмагани борасида ҳам ўз фикрини билдирган эди. Унга кўра, агар ўзи бориш ниятида бўлмаган бўлса, Путиннинг ҳам келишининг эҳтимоли кам:

— Агар мен бормасам, у нега келиш керак? Чунки мен боришни режалаштирмаганман. Борардим, лекин бу режада йўқ эди, — деди Трамп.

Россия президенти Владимир Путин 15 май куни Истанбулда Украина билан тўғридан-тўғри музокараларни бошлаш таклифини билдирган эди. Украина президенти Владимир Зеленский эса ушбу учрашувда Путиннинг шахсан қатнашишини кутаётганини алоҳида қайд этган.

Трамп музокараларни кузатишга тайёрми?

АҚШ президенти Дональд Трамп Россия ва Украина вакиллари ўртасида Истанбулда бўлиб ўтадиган эҳтимолий учрашувни кузатиш имкониятини кўриб чиқмоқда. Қўшимча равишда, АҚШнинг Украинадаги махсус вакили Кит Келлог ҳам агар Путин 15 май куни Туркияга келадиган бўлса, Трамп ҳам музокаралар жараёнида Истанбулда бўлиши мумкинлигини маълум қилди.

Бу баёнотлардан сўнг халқаро майдондаги қизиқиш янада ортди. Айниқса, Украина президенти Зеленскийнинг музокараларга шахсан иштирок этиши ва Путинни кутаётгани, АҚШнинг эса тўғридан-тўғри иштирок ёки кузатув режалари билан чиқиши музокараларнинг глобал сиёсий аҳамиятини янада оширмоқда.

Zamin.uz таҳририяти бу муҳим дипломатик жараённи диққат билан кузатишда давом этади. Трамп ва Путиннинг учрашуви амалга ошса, бу Украинадаги вазиятда ҳал қилувчи бурилиш бўладими? Сиз нима деб ўйлайсиз? «Замин»ни Telegram’да ўқинг!