Украинада яна бир F-16 қирувчиси қулади: учувчи катапултадан фойдаланди, тергов бошланди

16 майга ўтар кечаси Украина осмонида Россия томонидан амалга оширилган ҳаво ҳужумини қайтариш пайтида Украина Қуролли кучларининг F-16 қирувчи самолёти навбатдаги нохуш ҳолатга учради. Бу ҳақда Украина ҚК Ҳаво кучлари қўмондонлиги расман маълум қилди.

Маълумотларга кўра, учувчи ноштат вазият сабаб самолётни аҳоли яшаш манзилларидан четга буришга муваффақ бўлган. Ҳалокатдан олдин катапултадан фойдаланган ва қидирув-қутқарув гуруҳи томонидан тезкор эвакуация қилинган.

F-16 билан боғлиқ учинчи ҳалокат

Бу Украинага Ғарб давлатлари томонидан етказиб берилган Америкада ишлаб чиқарилган F-16 самолёти билан боғлиқ учинчи ҳалокат ҳисобланади. Учувчи омон қолгани қувонарли бўлса-да, техник ва ҳарбий жиҳатдан масала жиддий ўрганилишини талаб қилади.

Украина расмийлари ҳодиса сабабини аниқлаш учун махсус комиссия тузган. Ҳозирда ҳолат тергов қилинмоқда ва техник носозлик, инсон омили ёки ташқи таъсирлар эҳтимоли ўрганилаётгани маълум қилинди.

F-16: Украина учун стратегик зарурат

F-16 қирувчи самолётлари АҚШ томонидан Украинага 2024 йилнинг август ойида етказиб берилган эди. Илк партияда 10 та самолёт Киев ихтиёрига ўтказилган, йил охиригача бу рақамни 30 тагача, 2025 йил давомида эса 79 тагача етказиш режалаштирилган.

Президент Володимир Зеленскийнинг таъкидлашича, Россия ҳаво кучларига қарши самарали қарши ҳужум ташкил этиш учун Украинага камида 120-130 та F-16 талаб этилади.

Тарихий контекст: ҳалок бўлган қаҳрамонлар

F-16 билан боғлиқ илк ҳалокат 2024 йил августда рўй берганди. Ўша пайтда, ракета ҳужумини қайтариш пайтида малакали учувчи Алексей Мес ҳалок бўлган. У нафақат тажрибали пилот, балки Украинага F-16 етказиб бериш ташаббусини халқаро миқёсда тарғиб қилган шахслардан бири эди. Меснинг сўнгги парвози чоғида у учта ракета ва бир дронни уриб туширишга улгурган. У ўлимидан сўнг Украина Қаҳрамони унвони билан тақдирланган.

Иккинчи ҳалокат эса 2024 йил 12 апрель куни қайд этилган. 26 ёшли учувчи Павел Иванов ҳаётдан кўз юмган ва у ҳам давлат мукофоти билан тақдирланган.

Илғор технологияли F-16 қирувчилари Украина армияси учун стратегик аҳамият касб этаётган бир пайтда, бу каби ҳалокатлар ҳам техник, ҳам инсон ресурслари нуқтаи назаридан оғир йўқотиш сифатида баҳоланмоқда. Шу боис, бу ҳолатлар нафақат ҳарбий, балки сиёсий муҳокамаларга ҳам сабаб бўлмоқда.

Zamin.uz таҳририяти мазкур воқеалар ривожини диққат билан кузатишда давом этади. Сиз бу каби ҳалокатлар фонида Украина армиясида F-16 самолётларининг келажагини қандай тасаввур қиляпсиз? «Замин»ни Telegram’да ўқинг!