Салмон Рушдийга пичоқ билан ҳужум қилган Жерси Ҳади Матар 25 йилга қамалди

Нью-Йорк штатидаги Чаутоква округи суди жаҳонга машҳур британиялик ёзувчи Салмон Рушдийга суиқасд қилишга уринган Жерси Ҳади Матарга ҳукм чиқарди. 27 ёшли Матар 25 йил муддатга озодликдан маҳрум этилди. Бу ҳақда The Guardian нашри хабар берди.

Суд жараёни 10 феврал куни бошланган ва 21 февралда суд ҳайъати уни қотилликка уринганликда айбдор деб топган.

Адвокат ва айблов томонининг баҳслари

Матарнинг адвокати Эндрю Бротиган суддаги сўз чиқишида ҳимоясидаги шахс Рушдийни ўлдириш ниятида бўлмаганини ва буни исботлаш учун зарур далиллар етишмаганини таъкидлади. Унинг сўзларига кўра, Матар ёзувчининг юрак қисмини нишонламаган ва зарбалар ҳаётий муҳим аъзоларга эмас, юз ва бўйинга берилган.

Шу билан бирга, айблов томони Матар томонидан амалга оширилган 10–15 марта пичоқ зарбаси ўлимга олиб келиш эҳтимоли юқори эканини таъкидлаб, бундай ҳаракатни тўлиқ қотилликка уриниш сифатида баҳолади.

Суиқасд тарихи: китоб ва фатво

Маълумот учун, 2022 йил август ойида Чаутоква шаҳридаги маърузалар марказида ўтказилиши керак бўлган тадбирда Матар сахнага чиқиб, Салмон Рушдийга ҳужум қилганди. У шу пайтгача қувғинга учраган ёзувчиларга бошпана ҳақида маъруза қилиши керак эди. Аммо тадбир бошланишидан олдин Матар ёзувчига ташланиб, 15 марта пичоқ билан зарба берган. Ҳужум натижасида Рушдий ўнг кўзидан ажралган ва турли оғир жароҳатлар олган.

АҚШ Адлия вазирлигига кўра, Матар ушбу ҳаракати орқали Эрон оятуллоси Ҳумайний томонидан берилган ва Рушдийни ўлдиришга чақирувчи фатвони амалга оширишга уринган. Маълумки, Рушдий 1980 йилларда ёзилган “Шайтон суралари” романи билан мусулмон жамоаларида кескин эътирозларга сабаб бўлган ва Эронда унинг ўлимига фатво чиқарилган.

Матар ҳақида маълумот

Жерси Ҳади Матар АҚШда Ливанлик муҳожирлар оиласида туғилган. У Нью-Жерсида яшаб, кийим-кечак дўконида ишлаган. Унинг онасига кўра, ўғли охирги пайтларда оила билан алоқани узган ва ижтимоий жиҳатдан ёпиқ яшаган.

Салмон Рушдий ким?

Салмон Рушдий — британ ёзувчиси, 2016 йилда АҚШ фуқаролигини олган. У “Ярим тунда туғилган болалар” романи учун 1981 йилда Букер мукофотига сазовор бўлган. “Шайтон суралари” асари билан эса бутун дунёда танилиб, бир вақтнинг ўзида баҳс ва таҳдидларни ҳам орттирган.

Zamin.uz таҳририяти мазкур воқеанинг ижтимоий ва сиёсий таъсирларини кузатишда давом этади. Сиз бу воқеага қандай баҳо берасиз? «Замин»ни Telegram’да ўқинг!