Путин АҚШнинг тинчлик режасини муҳокама қилишни рад этди

Россия президенти Владимир Путин АҚШ президентининг махсус вакили Стив Уиткофф орқали тақдим этилган Украина бўйича тинчлик ташаббусини муҳокама қилишни истамади. Financial Times манбаларига кўра, Путин Вашингтон, Киев ва Европа томонидан ишлаб чиқилган 22 банддан иборат тинчлик режаси ҳақида гаплашишга ҳам рози бўлмаган.

Мазкур режа 25 апрель куни Уиткоффнинг Москвага сафари чоғида муҳокама қилиниши керак эди. Аммо Россия раҳбарияти Уиткоффга Путин бу масалани кўриб чиқишдан бош тортганини маълум қилган. Кейинчалик, режа Украина президенти аппарати раҳбари Андрей Ермак, Украина мудофаа вазири Рустем Умеров ва АҚШ расмийлари Марко Рубио, Кит Келлог иштирокидаги онлайн мулоқотда муҳокама қилинган.

Путиннинг рад жавобидан сўнг, Уиткофф ўтган ҳафтадаги (12–16 май) Россия раҳбари билан режалаштирилган учрашувни бекор қилди. У 2024 йил бошидан бери Путин билан тўрт марта кўришган, аммо ҳозирда янги учрашув белгиланмаган.

Financial Times таъкидлашича, Путиннинг самарали тинчлик музокараларидан юз ўгириши ҳатто унинг сиёсий тарафдорлари учун ҳам яққол бўлиб бормоқда. Бир кун олдин, 16 май куни Доналд Трамп Истанбулдаги музокаралардан сўнг шундай деган эди:

“Путин билан келишувга етишишимиз мумкин. Менимча, у чарчаган. Унинг кўриниши ҳам яхши эмас, лекин яхши кўринишини истайди.”

Шу билан бирга, The New York Post Уиткоффнинг дипломатик услубини танқид қилган. Газета ёзишича, у 25 апрель куни Путин билан учрашувга ёлғиз, маслаҳатчилар ёки ҳарбий экспертларсиз борган. Нашр манбаси уни “яхши инсон, лекин тажрибасиз ва ноўрин ҳаракат қилувчи шахс” сифатида таърифлаган.

Zamin.uz таҳририятидан:
Агар юқори даражадаги сиёсий шахслар ўртасида жиддий мулоқотнинг ўзи амалга ошмаса, тинчлик музокаралари қандай натижа бериши мумкин? Ушбу вазият Россиянинг музокараларга реал ёндашуви ҳақида нималарни англатади? Сиз бу ҳақда нима деб ўйлайсиз? «Замин»ни Telegram’да ўқинг!