Калифорнияда икки бошли илон туғилди

АҚШнинг Калифорния штатида жойлашган East Bay Vivarium ҳайвонлар парваришлаш марказида ноодатий табиий ҳодиса қайд этилди — инкубатор шароитида дунёга келган илоннинг икки бошли экани маълум бўлди. Бу ҳақда Popular Science нашри маълумот берди.

7 ойлик “сиам эгизаги”

Марказ ходимлари илон боласини инкубатордан чиқарган пайтда унинг бир эмас, икки бошли эканига гувоҳ бўлишган. Бундай ҳолат биологияда сиам эгизаклари деб аталади. Бу — туғма ҳолат бўлиб, икки бола бирга туғилади ва уларнинг таналари бириккан ҳолда бўлади. Аммо East Bay Vivarium мутахассислари қайд этишича, бу илонда битта тўлиқ фаол ички аъзолар тизими мавжуд бўлиб, бу унинг ҳаётда қолишига сабаб бўлган.

Бир бош “бошқарувчи”, иккинчиси кузатувчи

Ходимларнинг сўзларига кўра, илон доминант — яъни асосий бош орқали озиқланади, иккинчи бош эса нафас олади, атрофни кузатади, тилини чиқаради ва ташқари таъсирга жавоб қайтаради. Бироқ у овқатланишда қатнашмайди. Илгари бундай илонларнинг кўпчилиги бир неча ҳафта ичида нобуд бўлган, чунки икки бошли тана ичидаги мураккаб орган тизимлари бир-бири билан рақобатга киришган ёки иш фаолиятида тўқнаш келган.

Табиатда кам учрайдиган мўъжиза

Lampropeltis californiae турига мансуб бу илонлар одатда 1,5 метргача ўсади ва инсонга хавф солмайди. Улар табиатда асосан ярим чўлларда, бутазорларда ва сийрак ўрмонларда учрайди. Озиқланиш манбалари эса калтакесаклар, кичик кемирувчилар ва ҳатто бошқа илонлардан иборат.

East Bay Vivarium маркази вакилларига кўра, агар ушбу ноодатий илон бир ёшга тўлгунча яшаб қолса, уни доимий намойиш экспозициясига ўтказиш мумкин бўлади.

Zamin.uz таҳририятидан:
Бундай ҳодисалар табиатнинг ўзгача ва оламшумул қирраларини намоён этувчи жонли мисолдир. Илмий тадқиқот ва биологик кузатувлар учун ушбу икки бошли илон қимматли намунага айланиши мумкин. Сиз шундай табиий мўъжизаларга қандай муносабатдасиз? «Замин»ни Telegram’да ўқинг!