Зеленский: Украина ҳеч қачон ўз ҳудудидан чекинмайди

19 май куни кечқурунги брифингда Украина президенти Володимир Зеленский Россия ва АҚШ президентлари — Владимир Путин ва Доналд Трамп ўртасидаги телефон мулоқотидан сўнг, Киевнинг позициясига аниқлик киритди. Унинг таъкидлашича, Украина ҳеч қандай шароитда ўз ҳудудларидан қўшинларини олиб чиқмайди.

“Бу — менинг конституциявий бурчим”

Зеленский ўз чиқишида миллий хавфсизликни таъминлаш ва давлат ҳудудини муҳофаза қилиш президент сифатида унинг тўғридан-тўғри бурчи эканини таъкидлади:

“Ҳеч қандай ультиматумлар қабул қилинмайди. Ҳеч ким ўз юрти, халқини ёки уйини тарк этмайди. Агар Россия қўшинларни чиқаришимизни шарт қилиб қўяётган бўлса, бу — улар тинчликни истамаяпти, дегани. Улар яхши тушунишади: Украина буни қилмайди.”

Трамп ва Путин суҳбати ортидан муносабат

Зеленский, шунингдек, Доналд Трамп томонидан билдирилган баёнотларга ҳам эътибор қаратди. АҚШ президенти Россия муросага тайёр эканини таъкидлаган, шу билан бирга, Киев ва Москва ўртасида бевосита музокаралар бошланишига умид билдирган эди.

“Аввало – ўт очишни тўхтатиш”

Зеленскийнинг фикрича, урушни тугатишга бўлган ҳақиқий тайёргарлик авваламбор фронтда ўт очишни тўхтатиш билан бошланиши керак. У шундай деди:

“Агар Москва чинакам тинчлик истаса, биринчилардан бўлиб ўт очишни тўхтатиши лозим эди. Ана шунда биз муросага тайёрликни амалда кўрар эдик.”

Zamin.uz таҳририятидан:
Зеленскийнинг муросага эмас, суверенитет ва хавфсизликни устувор қўяётган позицияси Украина-Россия келишуви сари қўйиладиган ҳар қандай қадамда асосий тўсиқ бўлиб турибди. Сиз қандай фикрдасиз: тинчликка эришиш учун қайси томон биринчилардан бўлиб ён босиши керак? «Замин»ни Telegram’да ўқинг!