Трамп “Олтин гумбаз”ни эълон қилди: АҚШнинг 175 миллиардлик ракета қалқони

АҚШ президенти Доналд Трамп мамлакатнинг мудофаа тизимида янги саҳифа очишини маълум қилди — “Олтин гумбаз” деб номланган стратегик ракетага қарши муҳофаза лойиҳаси жорий қилинмоқда. Бу ҳақда у 20 май куни Оқ уйда ўтказилган махсус брифингда маълум қилди.

175 миллиард долларлик глобал мудофаа тўри

Президентнинг сўзларига кўра, лойиҳа умумий қиймати 175 миллиард долларга тенг ва у Америка қўшинлари ва фуқароларини ташқи ракеталар ҳужумларидан ҳимоя қилишга қаратилган. Унинг таъкидлашича, тизим гипертовушли, қанотли ва баллистик ракеталарни ҳамда дронларни самарали равишда тутиб олиш қобилиятига эга бўлади.

“Бу нафақат қуриқликда, балки денгизда ва ҳатто коинотда ҳам жойлаштириладиган тўлиқ мудофаа қалқони бўлади”, — деди Трамп. Унинг айтишича, баъзи радар ва перехватчилар тўғридан тўғри орбитада жойлаштирилади.

“Темир гумбаз”дан “Олтин гумбаз”гача

Трамп Исроилдаги “Темир гумбаз” тизимига ишора қилиб, Америка лойиҳасининг технологик жиҳатдан ундан анча ривожланган бўлишини таъкидлади: “Биз дунёдаги энг кучли ракета қалқонини яратамиз. Ва бу нафақат АҚШни, балки иттифоқчиларимизни ҳам ҳимоя қилади.”

2027 йилгача тайёр бўлади

Тизим фаолиятини 2027 йилгача — Трампнинг президентлик муддати якунига қадар ишга тушириш режалаштирилган. Унинг айтишича, дастурни амалга оширишда АҚШ космик кучлари иштирок этади, лойиҳани бошқариш учун генерал Майкл Гетлейн масъул этиб тайинланган.

Канада ҳам ҳамкорликка қизиқмоқда

Брифинг чоғида маълум бўлишича, Канада ҳукумати ҳам “Олтин гумбаз” дастурида иштирок этишга қизиқиш билдирган. Музокаралар яқин орада бошланиши кутилмоқда.

Zamin.uz таҳририятидан:
Трампнинг “Олтин гумбаз” ташаббуси нафақат ҳарбий жиҳатдан, балки геосиёсий тенглик нуқтаи назаридан ҳам жиддий стратегик сигнал ҳисобланади. Сиз нима деб ўйлайсиз — глобал мудофаа тизими тинчликни таъминлайдими ёки янги қуролланиш пойгасини бошлайдими? «Замин»ни Telegram’да ўқинг!