Европа Лигаси финали олдидан мухлислар ўртасида оммавий муштлашув содир бўлди!

Бугун Европанинг энг нуфузли клуб турнирларидан бири ҳисобланган Европа Лигасининг финал баҳси бўлиб ўтади. Ҳал қилувчи учрашув Испаниянинг Бильбао шаҳрида, Тошкент вақти билан соат 23:59 да бошланиши режалаштирилган. Финалда Англиянинг икки кучли клуби – "Манчестер Юнайтед" ва "Тоттенхэм" жамоалари соврин учун курашади.

Бироқ ушбу муҳим ўйиндан олдин икки клубнинг мухлислари ўртасида катта можаро юз бергани маълум бўлди. El Diario Vasco нашрининг хабар беришича, мухлислар ўртасидаги тўқнашув кеча оқшом Испаниянинг Сан-Себастьян шаҳрида содир бўлган. Сан-Себастьян Бильбаодан тахминан бир соатлик масофада жойлашган бўлиб, кўплаб мухлислар ўйиндан олдин шу ерда йиғилган эди.

Кўчага йиғилган икки клуб мухлислари дастлаб баланд овозда баҳс ва ўзаро ҳақоратлар билан бир-бирига мурожаат қилган. Гувоҳларнинг таъкидлашича, можаро "Тоттенхэм" мухлисларидан бири рақиб клуб мухлисини уриб юбораётганидан кейин кескин тус олган ва гуруҳлар ўртасида катта жанжал келиб чиққан.

Муштлашув пайтида фанатлар атрофдаги стол ва стуллар, шиша стаканлар ва чиқинди қутиларини бир-бирига отишган. Бу жараёнда кўплаб мухлислар енгил тан жароҳати олган. Аммо ҳодиса жойига етиб келган полиция тезкорлик билан вазиятни назорат остига олиб, жанжалнинг янада кенгайиб кетишига йўл қўймаган.

Маълум қилинишича, бир нечта мухлисларга тиббий ёрдам кўрсатилган, лекин жароҳатланганларнинг ҳеч бири оғир аҳволда эмаслиги сабабли шифохонага ётқизилмаган.

Айтиш жоизки, бу воқеа ушбу икки клуб мухлислари ўртасидаги биринчи тўқнашув эмас. Аввал ҳам турли сабаблар билан фанатлар орасида можаролар содир бўлиб келган. Полиция ва хавфсизлик кучлари финал ўйини пайтида ҳам эҳтимолий тўқнашувларнинг олдини олиш мақсадида жиддий чора-тадбирларни кўрган.

Zamin.uz таҳририяти мухлисларни спортдаги дўстлик ва ҳурмат қадриятларига амал қилишга чақиради ва финал баҳси атрофидаги барча янгиликларни диққат билан кузатиб боради.

Сизнингча, мухлисларнинг бу каби хатти-ҳаракатлари футбол обрўсига қай даражада зарар етказади?