Путин Трамп билан суҳбатда ютуққа эришдими? Bloomberg таҳлили

Россия президенти Владимир Путиннинг АҚШ президенти Доналд Трамп билан яқиндаги телефон мулоқоти ортидан халқаро сиёсий муҳитда янги қарама-қаршиликлар ва хавотирлар пайдо бўлди. Bloomberg нашрининг таҳлилига кўра, бу суҳбатда Путин дипломатик жиҳатдан вақт ютди ва Трамп томонидан кескин босимлар ва санкция таҳдидларининг юмшашига эришди.

Трамп сўзларида “мулойимлик” кўринмоқда

Маълумотларга кўра, Трамп суҳбат пайтида Путинга нисбатан кескин босим ўтказишдан тийилган. Бу эса экспертлар томонидан Россияга сигнал сифатида қабул қилинди — яъни, агар Путин ўт очишни тўхтатиш талабини рад этса ҳам, АҚШ унга нисбатан янги санкцияларни қўлламаслиги мумкин.

Журналистлар таъкидлаганидек, Трамп ҳатто Овал кабинетда президент Зеленскийни бир неча бор танқид қилган ва Кремлнинг айрим тезисларини такрорлаган. Бу ҳолат Европа давлатлари орасида Вашингтон Украинага ёрдамдан чекинишни бошламоқда, деган хавотирни кучайтирган.

Уотлинг: “Бу дипломатик чекиниш Путинга фойда”

Лондондаги Қироллик мудофаа тадқиқотлари институти таҳлилчиси Жек Уотлингга кўра, суҳбат натижалари Россия учун ижобий.

“Москва ҳозирча Украинадаги таъсирини кучайтириши мумкин деб ўйлаяпти. Агар Трамп Россияга қаттиқ босим ўтказишдан воз кечса, Кремль ўз амалиётларини фаоллаштиради,” — деди у.

Киев хавотирда, чунки АҚШ асосий куч

Украина президенти аппарати ва сиёсий доиралар бу суҳбатнинг ичидаги дипломатик юмшашдан жиддий хавотирга тушмоқда. Чунки Киевнинг Patriot ракета тизимлари, Starlink разведка имкониятлари каби муҳим қурол ва алоқалардаги асосий таянчи айнан АҚШ ҳисобланади. Агар Вашингтоннинг босими сусайса, Украина музокараларда кучсизроқ позицияда қолиши мумкин.

Россиянинг ўзи ҳам танлов олдида

Шу билан бирга, Жек Уотлинг таъкидладики, Кремл ҳам чексиз урушни давом эттириш имконига эга эмас. Агар уруш 2026 йилгача чўзилса, Россия янги, оғир иқтисодий ва сиёсий танлов — масалан, катта миқёсли сафарбарликга муҳтож бўлади.

Россиядаги ички таҳлил: музокарада “позиция мустаҳкамланмоқда”

Россиянинг “Миллий мудофаа” журнали бош муҳаррири Игор Коротченконинг фикрига кўра, Россия қайси ҳудудларни эгаллашига қарамай, музокараларда ўз позициясини мустаҳкамлай олади.

Zamin.uz таҳририяти халқаро сиёсий жараёнлар, Трампнинг кейинги баёнотлари ва Путиннинг музокаралар стратегиясини кузатишда давом этади. Сиз қандай фикрдасиз — Трампнинг позицияси тинчликка хизмат қиладими ёки урушни чўзадими? «Замин»ни Telegram’да ўқинг!