Трамп: Путин олов билан ўйнаяпти, у бутунлай ақлдан озган!

АҚШ президенти Доналд Трамп Россия ва Украина ўртасидаги можаро бўйича яна бир маротаба кескин баёнот билан чиқди. Унинг фикрича, Россия президенти Владимир Путин жаҳон хавфсизлигига жиддий таҳдид солаётган бўлиб, “олов билан ўйнаяпти”. Бу ҳақда Трамп ижтимоий тармоқдаги саҳифаси орқали маълум қилди.

— Владимир Путин тушунмаяпти, агар мен президентлик лавозимида бўлмаганимда, Россия билан жуда кўп ёмон ҳолатлар содир бўлган бўларди. Ҳақиқий фалокатлар, — деб ёзди Трамп, батафсил тафсилотларни келтирмасдан.

Унинг таъкидлашича, Путин жуда хавфли йўлни танлаган ва бу оқибатда глобал барқарорлик издан чиқиши мумкин.
— У олов билан ўйнаяпти! — деб қўшимча қилди Трамп.

Бу баёнот Россиянинг Украина шаҳарларига ракеталар ва дронлар орқали оммавий зарбалар бергани ва оқибатда 12 кишининг ҳалок бўлгани хабарлари ортидан келди. Бу ҳолатга жавобан Трамп Путинни очиқ ва кескин танқид қилди:

— У бутунлай ақлдан озган! Путин заруратсиз жуда кўп одамларни ўлдирмоқда. Бу фақат ҳарбийлар эмас — тинч аҳоли ҳам жабр чекяпти. Украина шаҳарларига ҳеч қандай асоссиз ракета ва дронлар йўлланмоқда, — дея фикр билдирди АҚШнинг собиқ раҳбари.

Кремль эса Трампнинг баёнотига муносабат билдириб, уни “ҳиссий юклама таъсирида ёзилган” деб баҳолади. Россия расмийлари ушбу танқидни жиддий қабул қилмаслигини билдиришган.

Халқаро сиёсий муҳитдаги бундай кескин баёнотлар Путин ва Трамп ўртасидаги мураккаб муносабатлар ҳақида янги баҳсларни келтириб чиқармоқда. Эндиликда кузатувчилар Вашингтон ва Москва ўртасидаги риторика янада чуқурлашиши мумкинлигини таъкидлашмоқда.