Илон Маск ҳукуматдаги вазифасини тарк этди: Трампга миннатдорчилик, лойиҳаларга эса танқид

Maшҳур тадбиркор ва технологик гигантлар раҳбари Илон Маск Америка ҳукуматидаги расмий вазифасини тарк этганини маълум қилди. 29 майга ўтар кечаси у ўзининг Х (собиқ Twitter) ижтимоий тармоғидаги саҳифасида шу ҳақда баёнот берди. Маскнинг сўзларига кўра, у “махсус ҳукумат ходими” сифатидаги фаолиятини якунлаган.

— Менга бу муддат мобайнида самарадорликни ошириш ва беъманиликларни қисқартириш имконини яратгани учун президент Доналд Трампга миннатдорчилик билдирмоқчиман, — деб ёзди Маск.

У раҳбарлик қилган Ҳукумат самарадорлиги департаменти (DOGE) ҳақида ҳам тўхталиб ўтди. Унга кўра, мазкур ташаббус келажакда янада кучаяди ва барча давлат муассасалари учун турмуш тарзига айланади.

DOGEга зарба берадиган қонун лойиҳаси

Бундан бир кун олдин, 28 май куни CBS телеканали Илон Маск билан бўлиб ўтган интервьюдан парчани Х саҳифасида тақдим этди. Интервью тўлиқ шаклда 1 июн, якшанба куни эфирга узатилади. Унда тадбиркор АҚШда муҳокама этилаётган янги қонун лойиҳаси ҳақида фикр билдирди.

Маск, хусусан, Доналд Трамп таклиф этаётган “катта ва чиройли” қонун лойиҳасини кескин танқид қилди. Унинг фикрича, бу ҳужжат давлат бюджетидаги харажатларни кескин ошириши ва ўзининг DOGE лойиҳасини заифлаштириши мумкин.

— Мен ушбу лойиҳани кўриб, ҳафсалам пир бўлди. Бунақа кенг қамровли ва қиммат қонун DOGE’нинг фалсафасига мутлақо зид, — деди Маск.

Фаолият тугади, таъсир қолмоқда

Илон Маскнинг ҳукуматдаги иштироки ҳеч қачон расмий вазирлик ёки классик сиёсий лавозим билан боғлиқ бўлмаган, лекин у давлат ичидаги самарадорликни ошириш ва бюрократик тизимни ислоҳ қилишга қаратилган ташаббусларни илгари сурган эди. DOGE номи (Government Efficiency) интернетдаги юморга асосланган криптовалюта — Dogecoin билан ҳам ўхшашлиги боис кенг муҳокамаларга сабаб бўлганди.

Эндиликда Илон Маск ўз фаолиятини хусусий секторда давом эттириши ва янги технологик йўналишларга эътибор қаратиши кутилмоқда. Аммо у сиёсий майдондан бутунлай четлашгани йўқ. Унинг Х саҳифасидаги билдиришлари, баёнотлари ва изоҳлари кўпинча жамоатчиликда шов-шувли муҳокамаларга сабаб бўлади.

Zamin.uz таҳририяти эслатади: Маск сиёсий қарашлари ва шижоати билан дунёдаги технология, иқтисод ва сиёсат чегараларини бир нуқтада тута олган кам сонли лидерлардан бири ҳисобланади. Унинг навбатдаги қадамлари ҳам катта қизиқиш билан кузатилади.