Россия АҚШ талабини рад этди: Мединский яна музокараларга жўнатилади!

Россия ҳукумати АҚШ президенти Доналд Трампнинг қатъий илтимосига қарамай, Владимир Путиннинг ёрдамчиси ва собиқ маданият вазири Владимир Мединскийни Украина билан бўладиган навбатдаги музокараларга жўнатишга қарор қилди. Бу ҳақда Россия ташқи ишлар вазирлигининг расмий вакили Мария Захарова 29 май куни «Россия 24» телеканали орқали маълум қилди.

Унинг сўзларига кўра, жорий йилнинг 2 июнь куни Туркиянинг Истанбул шаҳрида бўлиб ўтадиган Россия-Украина музокараларида Россия делегациясининг таркиби аввалгидек қолади ва унга яна Владимир Мединский раҳбарлик қилади.

Эслатиб ўтамиз, Мединский аввал ҳам бир неча марта Москва ва Киев ўртасидаги музокараларни бошқарган эди. Хусусан, 2022 йилда ҳамда шу йилнинг май ойида ҳам у Россия делегациясининг етакчиси сифатида иштирок этган. Бироқ унинг бу музокараларга жалб этилиши Ғарб мамлакатлари, айниқса АҚШ томонидан кескин эътирозларга сабаб бўлмоқда.

Америка ҳукумати, жумладан, президент Трампнинг маъмурияти, Владимир Мединскийни музокаралар жараёнидан четлатишни талаб қилиб келмоқда. АҚШ дипломатлари ва воситачилари фикрича, бу каби «қаттиқ сиёсат тарафдори»нинг иштирок этиши тинчлик жараёнига салбий таъсир кўрсатиши мумкин. Улар айниқса, Мединскийнинг аввалроқ Россиянинг Украинадаги ҳарбий ҳаракатларини оқловчи тарғибот характердаги тарих дарсликлари муаллифи эканидан хавотир билдираётган эди.

Қайд этиш лозимки, Мединский ўзининг ўткир ва баҳсли баёнотлари билан ҳам машҳур. У аввалроқ рус халқида «қўшимча хромосома» борлиги ҳақидаги қарама-қарши фикрлари орқали жамоатчиликда жиддий баҳсларни келтириб чиқарган.

Шундай бўлса-да, Россия томони АҚШ ва Ғарб давлатларининг эътирозларига қарамасдан ўз қарорини ўзгартиришни рад этди. Кремлга яқин манбаларга кўра, Владимир Путиннинг шахсан ишонч билдирган одамларидан бири бўлган Мединский музокараларда Москва манфаатларини ҳимоя қилиш учун энг муносиб номзод ҳисобланади.

Таҳлилчиларнинг фикрига кўра, бу қарор икки давлат ўртасидаги муносабатларда янги кескинликларни келтириб чиқариши эҳтимолдан йироқ эмас. Киев ва Москва музокаралари учун воситачилик қилаётган Ғарб мамлакатлари, айниқса АҚШ томонидан билдирилган норозиликларга қарамасдан, Россиянинг ўз позициясидан ортга чекинмаслиги халқаро сиёсий вазиятни янада мураккаблаштириши мумкин.

Хозирда жаҳон ҳамжамияти диққати яна Истанбулда ўтказиладиган музокараларга қаратилган. Бу учрашув қандай натижа бериши ва вазиятга қай даражада таъсир кўрсатиши катта қизиқиш билан кутиб қолинмоқда.