Истанбул музокараси олдидан Зеленский асосий шартларни белгилади

Украина президенти Володимир Зеленский Россия–Украина ўртасида 2 июн куни Истанбулда ўтказилиши режалаштирилаётган музокараларнинг иккинчи раундида Киев делегацияси иштирок этишини расман тасдиқлади. У бу ҳақда ўзининг Telegram-каналида маълумот берди.

Зеленскийнинг таъкидлашича, Украина томони ўз мустақиллиги, давлатчилиги ва халқининг тинчлиги учун барча зарур ҳаракатларни амалга ошираётган бир пайтда, Истанбул музокаралари ҳал қилувчи аҳамият касб этади.

"Яқин кунлардаги ҳаракатлар учун аниқ вазифаларни белгилаб олдим. Душанба куни бўлиб ўтадиган учрашув олдидан ўзимизнинг позициямизни қатъий белгиладим", — деди Зеленский.

У музокараларда Украина томони учун устувор бўлган тўрт асосий шартни санаб ўтди:

• Тўлиқ ва шартсиз ўт очишни тўхтатиш.
• Барча ҳарбий ва фуқаро асирларини озод қилиш.
• Уруш пайтида ўғирлаб кетилган украин болаларни ватанига қайтариш.
• Ишончли ва узоқ муддатли тинчлик учун хавфсизлик кафолатларини муҳокама қилиш ҳамда етакчилар даражасидаги учрашувга тайёргарлик кўриш.

"Бундай масалаларни фақат давлат раҳбарлари ҳал қила олади", — деб таъкидлади Зеленский.

Шунингдек, Украина етакчиси 1 июн куни ўтказилган махсус йиғилишда мудофаа ва ташқи ишлар вазирлари, Бош штаб, разведка ва хавфсизлик хизмати раҳбарларининг ҳисоботларини тинглаганини маълум қилди.

Музокараларда Украина делегациясига мудофаа вазири Рустем Умеров раҳбарлик қилади.

Айни пайтда Россия делегацияси ҳам Истанбулга йўл олгани маълум қилинди. ТАСС агентлигига кўра, делегацияга РФ президентининг ёрдамчиси Владимир Мединский бошчилик қилмоқда. Аввалроқ, 28 май куни Умеров ва Мединский телефон орқали мулоқот қилиб, музокараларнинг санаси ва регламентини келишиб олган эдилар.

Россия делегацияси Истанбулда ўтказиладиган учрашувда ўт очишни тўхтатиш бўйича меморандум лойиҳаси ҳамда қўшимча таклифлар билан иштирок этади.

Музокаралардан натижа қандай чиқиши номаълум, аммо бу мулоқот ҳарбий тўқнашувни сиёсий йўл билан ҳал этиш имконияти сифатида жаҳон ҳамжамияти томонидан диққат билан кузатилмоқда.

Фото: Украина президенти матбуот хизмати