Австралияда ракета парвозини какаду тўхтатиб қолди: ғаройиб ҳодиса тафсилотлари!

Австралиянинг машҳур стартап компанияси Gilmour Space Technologies томонидан ишлаб чиқилган 23 метрли Eris ракетаси май ойи ўрталарида ўзининг илк парвозини амалга ошириши керак эди. Бироқ ракета парвози сўнгги дақиқаларда ноодатий сабаб туфайли бекор қилингани маълум бўлди.

Компания техник ходимлари парвоз олдидан электр симларидаги носозликни аниқлади ва бу ҳолат ракета учирилишини кечиктиришга сабаб бўлди. Техник жамоа носозлик сабабини чуқур таҳлил қилганида эса, воқеа янада қизиқ тус олди: кабеллардаги носозликка инсон эмас, балки катта какаду тўтиқушининг дахлдор бўлганлиги гумон қилинмоқда.

Компания расмийларининг билдиришича, ушбу қуш ракета парвоз майдончасида жойлашган электр симларига ғоят катта қизиқиш билдирган ва бир неча бор уларга зарар етказган бўлиши мумкин. Тўлиқ текширувлар тугалланмаган ва қушнинг айбдорлиги расман тасдиқланмаган бўлса-да, компания вакиллари бу катта какаду ракета тизимидаги электр кучланишининг кескин кўтарилишида "муҳим рол ўйнаган омиллардан бири бўлиши мумкинлиги" ҳақида тахмин билдирмоқда.

Gilmour Space Technologies шу кунларда бу ғаройиб ҳодиса бўйича ички текширувни олиб бормоқда ва симлардаги носозликнинг аниқ сабабини тўлиқ аниқлаш устида ишламоқда. Улар тез орада Eris ракета тизими учун янги парвоз вақтини расман эълон қилишни режалаштирмоқда.

Эслатиб ўтамиз, Австралияда кўп тарқалган какаду тўтиқушлари тез-тез ўзларининг ўта қизиқувчанлиги билан одамларнинг эътиборини жалб қилиб туради. Лекин тарихда илк бор бу қушнинг ракета учирилишини тўхтатиб қолгани жамоатчилик орасида шов-шув бўлмоқда. Бу воқеа австралияликлар томонидан ижтимоий тармоқларда ҳам фаол муҳокама қилинмоқда.

Какаду тўқтата олган ракета тез орада яна бир бор ўз омадини синаб кўради. Улар бу сафар қушларга қарши ҳимоя чораларини кўриб чиқишни ҳам режалаштирмоқда. Ижтимоий тармоқларда эса "парвозга қарши какаду" деган ҳазиломуз ибора кенг тарқалмоқда.