Нетаняху Алиевга: Исроил-Туркия яқинлашувидаги ҳиссангиз учун раҳмат!

Исроил Бош вазири Биньямин Нетаняху Озарбайжон Президенти Илҳом Алиевга самимий миннатдорчилик билдирди. Бу ташаккур мактуби Озарбайжоннинг Мустақиллик куни муносабати билан юборилган расмий табрикка илова сифатида йўлланган.

Нетаняхунинг сўзларига кўра, Илҳом Алиевнинг дипломатик маҳорат ва фаоллик билан Исроил ҳамда Туркия ўртасидаги мулоқотни қайта тиклашга кўрсатган ёрдами минтақада тинчлик ва барқарорлик йўлида муҳим қадам бўлди.

"Сизнинг саъй-ҳаракатларингиз туфайли икки халқ ўртасидаги алоқаларда янги саҳифа очилди. Бу нафақат икки давлат учун, балки бутун минтақавий ҳамкорликнинг кенгайишига хизмат қилмоқда", — дейилади Нетаняхунинг мактубида.

Озарбайжоннинг геосиёсий мавқеи ва тинчликпарвар ташаббуслари минтақадаги муҳим ўринни эгаллаши таъкидланган. Шунингдек, Исроил раҳбари икки давлат ўртасидаги дўстона муносабатларни янада мустаҳкамлашга тайёр эканини билдирган.

Мазкур дипломатик мулоқот халқаро майдонда кенг муҳокама қилинмоқда. Сиёсатшунослар фикрича, Бокунинг воситачилик роли нафақат Исроил ва Туркия муносабатларини яқинлаштириш, балки Кавказ ва Яқин Шарқдаги барқарорликни таъминлашда ҳам катта аҳамият касб этади.