Тинч океанида 3000 та автомобиль ортилган кемада ёнғин чиқди

Тинч океанининг марказий қисмида йирик юк ташувчи кема — Morning Midasда ёнғин келиб чиққан. Кемада жами 3 мингга яқин автомобиль, жумладан, 800 дан ортиқ электромобиль мавжуд бўлган. Бу ҳақда Bloomberg агентлиги хабар тарқатди.

Талофатга учраган кема Аляскага қарашли Адак оролидан 480 км жанубда бўлгани айтилмоқда. У Хитойнинг Шандун провинциясидан 26 май куни йўлга чиққан ва 15 июнь куни Мексиканинг Ласаро-Карденас портига етиб бориши керак эди.

22 нафар экипаж аъзоси эвакуация қилинди

Баёнотда айтилишича, ёнғин кеманинг палубаларидан бири орқали тарқала бошлаган. Экипаж аъзолари ёнғинни ўчиришга ҳаракат қилган, аммо ёнғин катта ҳажмда авж олгани сабабли улар кема бортидан тезкор эвакуация қилинган.

Юк эгаларининг кимлиги маълум эмас

Юк эгаларининг шахсияти очиқланмаган. Ҳозирда ёнғин келиб чиқишининг аниқ сабаблари ҳам ўрганилмоқда. Morning Midas кемаси 2006 йилда Хитойдаги Xiamen Shipbuilding Industry Co. томонидан қурилган. 46,8 минг тонна оғирликдаги ушбу кема ҳозирда Либерия байроғи остида ҳаракатланмоқда.

Литий-ион аккумуляторлар — янги хавф манбаи

Allianz компанияси томонидан тақдим этилган таҳлилга кўра, электромобильларда қўлланадиган литий-ион аккумуляторлар автомобиль ташувчи кемалар учун кучли хавф-хатар манбаига айланмоқда. Бу турдаги ёнғинларни ўчириш жуда қийин, чунки аккумуляторлар катта иссиқлик чиқаради ва кемадаги шамоллатиш тизими етарли даражада фаол эмас.

Нашрнинг таъкидлашича, кема пўлат конструкциясида қурилгани сабабли ёнғинни назорат қилиш янада мураккаблашади ва бу экипаж аъзолари учун жиддий хавф солади.

Тинч океанида юз берган ушбу ёнғин ҳодисаси электр транспорт воситаларининг юк ташишдаги хавфсизлиги билан боғлиқ янги саволларни кун тартибига олиб чиқди. Электромобиллар сони ортиб бораётган ҳозирги кунда, юк ташишдаги хавф-хатарларни минималлаштириш ва янги хавфсизлик протоколларини жорий этиш зарурати яна бир бор намоён бўлди.

Фото: AP Photo