Ким Чен Ин Россияни Украина урушида қўллашни ваъда қилди!

Шимолий Корея раҳбари Ким Чен Ин Пхенянда Россия Хавфсизлик кенгаши раиси Сергей Шойгу билан бўлиб ўтган учрашувда Россия Федерациясини Украинадаги қуролли низода бундан кейин ҳам қатъий қўллаб-қувватлашга тайёрлигини маълум қилди. Бу ҳақда КХДРнинг асосий ахборот агентлиги КМТА 4 июнь куни тарқатган баёнотида айтилган.

Ким Чен Ин Россиянинг жаҳон миқёсидаги муҳим сиёсий масалаларда тутган позициясини «тўлиқ ва сўзсиз» қўллашини таъкидлаб, Украина билан боғлиқ бўлган ташқи сиёсатни ҳам қўллаб-қувватлашга тайёр эканини билдирди.

«КХДР раҳбарияти Россиянинг Украинада олиб бораётган махсус ҳарбий амалиётини «адолатли ва муқаддас кураш» сифатида баҳолайди ва бу йўлда Россиянинг музаффар бўлишини самимийлик билан тилайди», — деб келтирилган Кимнинг сўзлари КМТА хабарномасида.

Учрашув чоғида Шимолий Корея етакчиси ва Россия Хавфсизлик кенгаши раиси Шойгу шунингдек, Курск вилоятидаги ҳарбий операцияларни ҳам атрофлича муҳокама қилган. Унда, айниқса, КХДР аскарларининг россиялик ҳарбийлар билан биргаликда Украина Қуролли кучларига қарши олиб борган жангларда кўрсатган қаҳрамонликлари таъкидланди.

«Рус аскарлари билан ёнма-ён туриб, Курск вилоятини озод қилиш операциясида қатнашган, Россия ҳудудининг бир қисми бўлган бу ерларни ўз ватани каби ҳимоя қилган Шимолий Корея аскарларининг жасорати ва фидойилиги унутилмасдир», – дея алоҳида таъкидланади КМТА хабарида.

Шу билан бирга, Россия Хавфсизлик кенгаши матбуот хизмати ҳам бу учрашув ҳақида хабар бериб, Россия ва Шимолий Корея биргаликда «корейс аскарларининг хотирасини абадийлаштириш бўйича амалий тадбирларни» муҳокама қилганини маълум қилди.

Айтиш лозимки, Россия ва КХДР ўртасидаги стратегик ҳамкорлик Владимир Путиннинг 2024 йил 19 июнда Пхенянга амалга оширган расмий ташрифи пайтида имзоланган шартнома билан мустаҳкамланган. Бу шартномага мувофиқ, агар икки давлатдан бири қуролли тажовузга учраса, иккинчи давлат унга ҳарбий ва бошқа зарурий ёрдам кўрсатиш мажбуриятини ўз зиммасига олган.

Бу учрашув Шимолий Корея ва Россия ўртасидаги яқинлашувнинг навбатдаги тасдиғи бўлиб, халқаро сиёсий майдонда катта шов-шувларга сабаб бўлмоқда. Хусусан, КХДРнинг Россияни Украина урушида очиқчасига қўллаши Ғарб давлатлари томонидан кескин танқид остига олиниши кутилмоқда. Аммо, икки мамлакатнинг бу каби ҳамкорлиги халқаро сиёсатда янги вазиятларни юзага келтириши шубҳасиздир.