Колумбияда президентликка номзодга суиқасд: сенатор ҳаёт учун курашмоқда!

Колумбия пойтахти Богота шаҳрида даҳшатли воқеа содир бўлди: мамлакатнинг етакчи сенаторларидан бири, 2026 йилги президентлик сайловида иштирок этишини маълум қилган Мигел Урибе Турбай оммавий митинг пайтида қотиллик ҳужумига учради. Ҳужум натижасида оғир яраланган сиёсатчи зудлик билан вертолёт орқали маҳаллий шифохонага етказилди. Айни пайтда сенаторнинг аҳволи жуда оғир ва у шифокорларнинг назорати остида ҳаёт учун курашмоқда.

Маълум бўлишича, бу фожиали воқеа сенатор Урибе ўзининг сайловолди ташвиқот кампанияси доирасида одамлар билан учрашув ўтказаётган пайтда юз берган. Бир неча юзлаб одам йиғилган майдонга мототциклда икки шахс яқинлашган ва улардан бири кутилмаганда сенаторга қарата бир неча марта ўқ узган. Шоҳидларнинг айтишича, ҳужумчининг қароғидан отилган беш-олти ўқ Мигел Урибенинг боши ва тиззасига теккан.

Сенаторнинг тансоқчилари зудлик билан жавоб қайтариб, жиноятчиларга қарши отишма бошлаган. Ҳужум содир этган шахс тез орада қўлга олинган. Қўлга олинган шахснинг ёши жуда кичиклиги кўпчиликни ҳайратга солган. Баъзи манбаларга кўра, ҳужумчи ўсмир ёшида бўлиб, эндигина 15 ёшни қарши олган (бошқа маълумотларга кўра 14 ёш). Ушбу ўқ узган ёш жиноятчи ҳам отишма вақтида яраланган ва ҳозирда полиция назорати остида.

Urgente 🇨🇴

Aquí está el momento del atentado al Dr Miguel Uribe

Que dolor de Patria
Gobierno miserable !

Imágenes sensibles pic.twitter.com/tA3VWGap5V

— Luis Aníbal Rincón Arguello. ® 🇨🇴 (@Rincon001A) June 7, 2025

Ҳибсга олинган ўсмир тергов жараёнида ўз жонини сақлаб қолиш эвазига ҳужум ҳақидаги муҳим маълумотларни тақдим этишга тайёрлигини билдирган. Колумбиянинг мудофаа вазири Педро Санчес бу мудҳиш ҳужумга алоқадор бўлган шахсларни аниқлаш учун муҳим маълумот тақдим этганларга катта пул мукофоти беришини маълум қилди. Мукофотнинг миқдори 3 миллиард песогача (тахминан 730 минг АҚШ доллари) белгиланган.

Шифокорларнинг маълум қилишича, сенатор Мигел Урибе Турбайнинг ҳолати жуда оғир. Ҳозирги вақтда шифокорлар унинг ҳаётини сақлаб қолиш учун бутун кучлари билан ҳаракат қилишмоқда. Сенаторнинг турмуш ўртоғи Мария Клаудия Таразона ижтимоий тармоқларда чиқиш қилиб, Урибе жон сафарбар қилиб, ўлим билан курашаётганини айтди. Кейинроқ у операция тугаганини, аммо аҳволи ҳануз оғирлигича қолганини қўшимча қилди.

Ушбу ҳужум бутун мамлакатда кенг муҳокамаларга сабаб бўлди ва давлат раҳбарлари томонидан кескин қораланди. Мамлакат президенти Густаво Петро ушбу мудҳиш воқеани қоралаб, Францияга режалаштирилган дипломатик сафарини бекор қилди. Америка Қўшма Штатлари давлат котиби Марко Рубио ҳам ҳужумни кескин танқид қилди ва буни демократияга қарши йўналтирилган таҳдид сифатида баҳолади. Рубионинг фикрига кўра, бу каби жиноятлар мамлакатнинг юқори доираларидан чиқувчи сиёсий адоватнинг натижасидир.

Ҳужум қурбони бўлган Мигел Урибе Турбай Колумбия сиёсий майдонида машҳур оиладан бўлиб, собиқ президент Алваро Урибе томонидан ташкил қилинган "Демократик марказ" консерватив партиясининг етакчи вакилларидан ҳисобланади. Айниқса, унинг бобоси Хулио Сезар Турбай 1978 йилдан 1982 йилга қадар Колумбия президенти сифатида фаолият юритган. Шу билан бирга, сенаторнинг онаси Диана Турбай ҳам тарихда машҳур шахс бўлиб, таниқли журналист сифатида танилган ва 1991 йилда жиноятчи Пабло Эскобарнинг Меделин картели томонидан ўғирланган ва озод қилиниши пайтида фожиали тарзда ҳалок бўлган.

Ҳозирги пайтда Колумбия ҳуқуқни муҳофаза қилувчи идоралари ушбу жиноят бўйича кенг қамровли тергов ишларини олиб боришмоқда. Мамлакатдаги сиёсий вазият кескинлашган ва аҳоли орасида хавотир уйғотган. Экспертларнинг айтишича, бу каби ҳужумлар мамлакатнинг ички вазиятини янада мураккаблаштириши ва сиёсий беқарорликка олиб келиши мумкин.

Шунинг учун ҳам, айни вақтда колумбияликлар ушбу жиноий ҳаракатни содир этган барча шахсларнинг қонун олдида адолатли жазоланишини талаб қилишмоқда. Урибенинг аҳволи ва ҳужумнинг барча тафсилотлари бўйича аниқ маълумотларнинг эълон қилиниши кутилмоқда. Бу воқеа, шубҳасиз, Колумбия сиёсий ҳаётида муҳим таъсир кўрсатиши мумкин бўлган воқеа сифатида тарихга кириши эҳтимоли юқори. «Замин»ни Telegram’да ўқинг!