92 ёшли хитойлик аёл спортга шижоат билан барчага намуна бўлмоқда

92 ёшли Ли фамилияли аёл Хитойда нафақат ўз авлоди, балки ёшлар учун ҳам саломатлик ва ҳаётга муҳаббат рамзига айланди. Марказий Хунан вилоятида истиқомат қилувчи бу кексайган аёлнинг кундалик ҳаёт тарзи ҳақида лавҳа телевидениеда намойиш этилгандан сўнг, у бутун мамлакатда кенг муҳокамага сабаб бўлди.

Журналистлар унинг хонадонга ташриф буюрганда, Ли опа ўзини одатий жойи — каравоти ёнида топди ва меҳмонлар олдида 100 марта ўтириб-туриш, кейин эса полда 200 марта қўлни букиб ёйиш машқларини осонгина бажарди. Шу тариқа, у ҳар куни узоқ йиллар давомида ана шу фаол ҳаёт тарзини тўхтатмасдан олиб келаётганини исботлади.

92 ёшли Лининг айтишича, доимий спорт машғулотлари унинг фақат жисмоний эмас, балки руҳий ҳолатини ҳам мустаҳкамлаган. "Эҳтимол, мен бажарадиган машқларим мукаммал стандартларга тўғри келмас, аммо асосийси — ҳар куни ҳаракатдаман ва бу ўзимни яхши ҳис қилишимга ёрдам беради", — дейди у. Шунингдек, буви "чамбарак айлантиришда ҳам моҳирона ҳаракат қила олишини" қўшимча қилади.

Хитойда кекса авлод вакиллари спортга катта аҳамият беришади. Куннинг эрта тонгидан кечгача шаҳарлар ва қишлоқларда тайцзи гимнастикаси билан шуғулланаётган, жамоат майдончаларидаги тренажёрларда фаол ҳаракат қилаётган ёки катта кўчаларда мусиқа остида рақса тушаётган инсонларни кўриш одатий ҳол. Бу эса мамлакатда ёши катталарнинг узоқ ва соғлом ҳаёт сири фаол турмуш тарзида эканини яна бир бор тасдиқлайди.

Ли опанинг фидокорона машғулотлари ва кўрсатаётган намунаси бутун Хитой бўйлаб ижобий кайфият уйғотди. Унинг ҳикояси нафақат саломатлик, балки шижоат ва ҳаракат ҳаёт учун энг муҳим “витамин” эканини исботлаб турибди.